Merz paralajmëron se lufta në Ukrainë mund të vazhdojë për një periudhë të zgjatur

Lajme

Gazeta Express

31/08/2025 21:00

Kancelari gjerman Friedrich Merz shprehu sot skepticizëm mbi arritjen e një përparimi diplomatik midis Rusisë dhe Ukrainës, duke paralajmëruar se konflikti mund të vazhdojë për një periudhë të zgjatur.

Në një intervistë për transmetuesin publik ZDF, Merz riafirmoi se pavarësisht përpjekjeve të presidentit të SHBA-së Donald Trump për t’i dhënë fund luftës në Ukrainë, veprimet e fundit të presidentit rus Vladimir Putin tregojnë qartë mungesën e interesit të tij për negociata.

“Nuk po heq dorë nga shpresa se mund ta arrijmë këtë. Por gjithashtu nuk kam iluzione”, tha udhëheqësi konservator, duke shtuar se historia tregon se luftërat zakonisht përfundojnë në njërën nga dy mënyrat: ose përmes një disfate ushtarake nga njëra anë ose përmes lodhjes ekonomike dhe ushtarake.

“Por nuk e shoh këtë të ndodhë nga asnjëra palë për momentin. Kështu që po përgatitem mendërisht për faktin se kjo luftë mund të vazhdojë për një kohë të gjatë. Po përpiqemi ta përfundojmë sa më shpejt të jetë e mundur. Por sigurisht jo me çmimin e dorëzimit të Ukrainës”, tha Merz.

Kur u pyet për garancitë perëndimore të sigurisë dhe nëse Gjermania do të dërgonte trupa tokësore në Ukrainë si pjesë e një marrëveshjeje të mundshme paqeje, kancelari argumentoi se vendosja e trupave nuk është një temë kryesore në negociatat aktuale diplomatike.

“Aktualisht po përpiqemi të formulojmë garanci sigurie në rast të një armëpushimi. Dhe përparësia numër një është mbështetja e ushtrisë ukrainase në mënyrë që ata të mund të mbrojnë vendin e tyre në planin afatgjatë. Ky është përparësia absolute”, tha Merz.

“Shumë gjëra mund të zbatohen vetëm pasi të ketë një armëpushim. Kjo kërkon një marrëveshje me Rusinë dhe kjo marrëveshje, sigurisht, do të ketë kushte nga të dyja palët. Nga ana jonë, kushti është që Ukraina të ruajë përgjithmonë pavarësinë e saj, lirinë e saj dhe lirinë e saj për të zgjedhur aleancat e veta”, shtoi ai.

Merz sqaroi gjithashtu se çdo vendim mbi kontributin e Gjermanisë në këto garanci sigurie, qoftë dërgimi i trupave paqeruajtëse apo ofrimi i mbështetjes për mbrojtjen ajrore, do të përcaktohet nga parlamenti gjerman.

“Askush nuk po flet për trupa tokësore në Ukrainë në këtë pikë. Një mandat i Bundestagut, të cilin e përmenda, zbatohet për çdo vendosje ushtarake jashtë vendit dhe edhe nëse do të mbronim vetëm hapësirën ajrore mbi Ukrainën, do të na duhej një mandat i Bundestagut për këtë,” tha Merz, transmeton KosovaPress.