Mentor Shala: Vota në Eurovision është politike, vetë kam lobuar për Shqipërinë sa isha Drejtor i RTK’së

Lajme

Gazeta Express

17/05/2025 23:44

Ish-drejtori i Radiotelevizionit të Kosovës (RTK), Mentor Shala, ka reaguar lidhur me procesin e votimit në Festivalin Evropian të Këngës – Eurovision.

Në një postim të bërë në Facebook, Shala ka deklaruar se “gjithçka është politikë” në Eurovision, duke theksuar se shumica e anëtarëve të Unionit të Transmetuesve Evropian (EBU) vijnë nga Evropa Lindore dhe Juglindore, përfshirë edhe vende si Rusia, Gjeorgjia dhe Bjellorusia. Sipas tij, këto vende përbëjnë shumicën e votave të jurisë dhe ndikojnë drejtpërdrejt në renditjen përfundimtare të garës.

“Shqipnia e ka problem edhe me pas kangën ma t’mirën n’botë me fitu,” shkruan Shala, duke sugjeruar se pa lobim të mirëfilltë në radhët e EBU-së, sukseset janë të vështira.

Ai ka shtuar se votat e jurisë nuk janë të pavarura, por varen nga lobimi që Drejtorët e Përgjithshëm të transmetuesve publikë bëjnë te kolegët e tyre.

“Vota e jurisë është politike. Vetë kam qenë pjesë e lobimeve për votën e jurisë për homologët e mi të RTSH sa kam qenë në krye të RTK-së,” tha ai.

Ndërsa për votën e publikut, Shala tha se nuk mund të flasë me siguri për shkak të mungesës së informacionit mbi mekanizmin e mbikëqyrjes së saj.

Në fund të postimit, ai ka dhënë edhe një këshillë për publikun që ndjek Eurovisionin:

“Ngone muzikën e kënaqnu e mos u bani nervoz kush fiton.”