Më të votuarit/ Gonxhja dhe Gjiknuri kryesojnë për PS, Alimehmeti nga PD, Ilir Meta mbetet jashtë Kuvendit

Shqiperi

Gazeta Express

14/05/2025 10:36

Pas përfundimit të numërimit të votave brenda Shqipërisë, vëmendja tashmë është përqendruar tek rezultatet e listave të hapura, ku po numërohen votat preferenciale për kandidatët. Sipas sistemit aktual, mandatet e para u takojnë kandidatëve të listës së mbyllur, të vendosur nga vetë partitë politike. Por në rast se një forcë politike fiton më shumë mandate se numri i emrave në listën e mbyllur, kandidatët nga lista e hapur hyjnë në lojë, ku gjithçka vendoset nga preferencat e qytetarëve.

Tiranë – Partia Socialiste
Në kryeqytet, pesë burrat më të votuarit nga lista e hapur e PS-së janë:

• Blendi Gonxhja – 8085 vota
• Ministri Ervin Hoxha – 4317 vota
• Fatmir Xhafaj – 3803 vota
• Erion Braçe – 3753 vota
• Ornaldo Rakipi – 2807 vota

Ndër gratë, më afër marrjes së një mandati janë:

• Antonela Dedej – 1976 vota
• Anila Denaj – 1403 vota

Tiranë – Opozita
Nga koalicioni i drejtuar nga Sali Berisha, i cili deri tani ka siguruar vetëm 13 mandate, në Tiranë pritet të futet në Kuvend vetëm Ilir Alimehmeti, me 4287 vota.

Jorida Tabaku, megjithëse e dyta më e votuar në këtë listë me 4079 vota, mbetet jashtë. Jashtë rrezikon të mbetet edhe Ilir Meta, që ka marrë vetëm 1535 vota. Edhe nëse kandidatët e sigurt të Partisë së Lirisë dorëzojnë mandatin, Meta nuk futet në Kuvend, pasi nuk renditet i 14-ti më i votuar në Tiranë.

Më të votuarit e PS në qarqe:

• Shkodër – Edona Bilali (6296 vota)
• Lezhë – Pranvera Skana (3768 vota)
• Kukës – Alban Zeneli (4207 vota)
• Korçë – Ilirian Pendavinji (7086 vota)
• Gjirokastër – Tërmet Peçi (9468 vota)
• Fier – Klevis Jahaj (10,483 vota)
• Elbasan – Sara Mila (10,693 vota)
• Durrës – Arkend Balla (9215 vota)
• Dibër – Agron Malaj (12,492 vota)
• Berat – Hysen Buzali (8189 vota)
• Vlorë – Damian Gjiknuri (10,031 vota), ndjekur nga Vullnet Sinaj (8757) dhe Ardit Bido (7360)

Më të votuarit e PD dhe aleatëve në qarqe:

• Shkodër – Bardh Spahia (7011 vota)
• Lezhë – Gjin Gjoni (4318 vota)
• Kukës – Shkëlqim Shehu (7493 vota)
• Korçë – Jorida Mazelliu (4356 vota)
• Gjirokastër – Alma Kore (3569 vota)
• Fier – Gentian Çela (5196 vota)
• Elbasan – Qani Xhafa (3767 vota)
• Durrës – Arjan Ndoj (4622 vota)
• Dibër – Përparim Spahiu (5346 vota)
• Berat – Parid Mahmutaj (7133 vota)
• Vlorë – Petraq Gjikuria (3533 vota)

Edhe pse renditja në listën e hapur bëhet pa prag, ligji parashikon që të paktën 1 në 3 kandidatë që marrin mandat të jetë femër, çka mund të ndikojë në përbërjen përfundimtare të Kuvendit.