Me rritjen e temperaturave, gjarpërinjtë bëhen më aktivë – Fondacioni për të Drejtat e Kafshëve del me disa këshilla

Lajme

Gazeta Express

08/05/2025 9:35

Me rritjen e temperaturave në mbarë Kosovën, gjarpërinjtë bëhen më aktivë – veçanërisht në zonat rurale, fusha, pyje, madje edhe afër shtëpive. Ndër speciet që gjenden në Kosovë, Vipera (Nëpërka) është më helmuesi, dhe ndërsa kafshimet janë të rralla, ato mund të jenë të rrezikshme nëse nuk trajtohen shpejt.

Prandaj Fondacioni për të Drejtat e Kafshëve, ka kërkuar kujdes të shtuar. Kjo pasi, sipas tyre, moti më i ngrohtë do të thotë se gjarpërinjtë rishfaqen në hapësira të ndryshme.

Ata kanë dalë edhe me një manual dhe disa këshilla nëse hasni në gjarpërinj.

🔍 Ku mund të shihni gjarpërinjtë

– Në shkëmbinjë, shtigje malore dhe rrugë

– Fshehur në bar të gjatë, shkurre, grumbuj druri ose nën mbeturina

– Pranë burimeve të ujit ose pikave me hije gjatë vapës

🛡️ Si t’i shmangni gjarëprinjtë:

– Mbathni këpucë të mbyllura dhe pantallona të gjata kur ecni në natyrë

– Përdorni një shkop për të shushuritur butësisht shkurret ose barin përpara jush

– Mos ngritni gurët ose trungjet pa kontrolluar më parë

– Shmangni ecjen nëpër bar të gjatë pa një shteg të dukshëm

– Mbani oborret dhe pronat të pastra – largoni grumbujt e drurit, mbeturinave dhe barërat e këqija

🚨 Nëse shihni një gjarpër

– MOS u përpiqni ta vrisni ose të afroheni shumë!

– Qëndroni të qetë dhe largohuni ngadalë

– Edukojini fëmijët të shmangin gjarpërinjtë dhe të njoftonjnë një të rritur nëse hasin në një gjarpër

🧑‍⚕️ Nëse kafshoheni nga një gjarpër (sidomos një nepërkë):

– Qëndroni të qetë – paniku rrit rrahjet e zemrës dhe përhap helmin më shpejt

– Imobilizoni gjymtyrën e kafshuar

– MOS thithni helmin dhe mos e preni plagën

– Telefononi menjëherë Shërbimet e Urgjencës (112) ose shkoni në spitalin më të afërt

– Nëse mundeni, kini parasysh pamjen e gjarprit (për trajtim), por mos rrezikoni sigurinë tuaj duke u përpjekur ta kapni ose fotografoni atë

🧠 Mbani mend: Shumica e gjarpërinjve në Kosovë nuk janë helmues, madje nepërkat kafshojnë vetëm nëse kërcënohen. Ata luajnë një rol të rëndësishëm në ekosistem – duke kontrolluar brejtësit dhe dëmtuesit.

Le të qëndrojmë të sigurt dhe të informuar – dhe të respektojmë jetën e egër duke mbrojtur veten dhe komunitetet tona. 🌿💚