“Më ka ngelur peng, i thashë do të vij të të takoj!”

Yjet

Gazeta Express

29/05/2025 19:18

Niku rrëfeu historinë se si Piro Milkani erdhi dhe e takoi dhe i dorëzoi skenarin…

I ftuar në emisionin “Pardon My French” në Top Albania Radio ka qenë aktori i njohur Nik Xhelilaj. Në një intervistë mjaft të veçantë me Jonida Aliçkollin dhe Arbër Çepanin aktori ka zbuluar detaje nga jeta e tij, karriera, projektet që do të vijnë dhe sigurisht është ndalur edhe tek regjisori Piro Milkani, i cili ndërroi jetë më 24 Maj.

Një prej figurave më të rëndësishme të kinematografisë shqiptare, me një karrierë të gjatë dhe kontribut të jashtëzakonshëm në artin e regjisurës.

Kontakti i parë i Nik Xhelilaj me kinematografinë ka qenë pikërisht me regjisorin Piro Milkani. Si nisi gjithçka?

Unë sapo kisha mbaruar vitin e parë në Akademi dhe siç kemi qenë të gjithë në atë moshë me ato dyshimet tona fillo një gjë dhe duke e lënë më pas. Nuk e di pse më ishte mbushur mendja që nuk isha për atë gjë dhe doja që ta lija akademinë.

Niku rrëfeu historinë se si Piro Milkani erdhi dhe e takoi dhe i dorëzoi skenarin që ai ta lexonte për veprën që ai si regjisor donte të sillte.

Ai kishte një ndjesi, unë sot e kuptoj që të zbulonte diçka tek ty. Ishte zbulues talentesh dhe insistuesh. Për të ishte filmi i fundit por për mua ishte hapja e një dere, një shans i cili vjen një herë në jetë.

Si ishte për Nik Xhelilajn bashkëpunimi në terren me Piro Milkanin?

Ai kishte një ndjesi mirësie, të qetësonte dhe nuk të jepte atë frikën. Nuk e mbaj mend që ai të ketë ngritur ndonjëherë zërin. Jo vetëm unë, por të gjithë kur ishim në set e dëgjonim me adhurim.

Aktori shtoi gjithashtu se:

Do të më mungojë shumë. Vitin e fundit nuk ishte shumë mirë fizikisht, telefonata kemi bërë. Një peng më ka ngelur, i thashë që do të vij që të të takoj dhe nuk erdha dot para një muaji. Besoj që ajo shtysa dhe motivimi që më jepte do të më mbesë gjithmonë. Do t’i jem falënderues gjithmonë.