Mbrojtësi largohet nga Barcelona dhe firmos me rivalin e La Ligas

Sport

Gazeta Express

09/06/2025 16:31

Barcelona dhe Clement Lenglet do të ndajnë rrugët, pasi janë marrë vesh për ndërprerjen e kontratës të francezit, e cila kishte vlerë edhe për dy sezone tjera. Qendërmbrojtësi kaloi sezonin që sapo lamë pas si i huazuar tek Atletico Madridi.

29-vjeçari Lenglet kaloi te Barcelona në vitin 2018 nga Sevilla për shumën e 36 milionë eurove, derisa ka fituar gjithçka me klubin në futbollin spanjoll, mirëpo nuk ka qenë i preferuar në skuadër që tri sezone, duke i kaluar të gjitha si i huazuar.

Mirëpo, pas bisedimeve të gjata, Lenglet dhe Barcelona kanë rënë dakord për ta shkëputur kontratën e tij.

Pjesë e arsyes për arritjen e marrëveshjes ishte dëshira e Lengletit për të vazhduar tek Atletico, pas një sezoni ku pothuajse shumicën e ndeshjeve ishte startues.

Sipas Fabrizio Romanos, palët janë pajtuar që Lenglet të largohet nga Barcelona si lojtar i lirë dhe të nënshkruajë me Atleticon një kontratë trivjeçare.

Lenglet hoqi dorë nga një shumë e konsiderueshme parash për të nënshkruar me Atleticon, derisa Barcelona do të kursejë 16 milionë euro në sezon nga paga e tij.

Nëse kontratat nënshkruhen në kohë, atëherë Lenglet do të jetë i gatshëm të luajë me Atleticon në Kupën e Botës për Klube.

Gjithsej, Lenglet kishte bërë 160 paraqitje për Barcelonën, duke shënuar shtatë gola dhe duke dhuruar tri asistime.

Fillimisht, ai ishte i favorizuar në qendër të mbrojtjes, duke fituar një vend startues përkrah Gerard Piques, por më pas mbeti jashtë formacionit startues, duke kaluar në huazim te Tottenhami e Aston Villa, para kalimit tek Atletico sezonin e kaluar.

Lengleti fitoi La Ligan, Kupën e Mbretit dhe Superkupën e Spanjës me Barcelonën.

Këtë sezon që e lamë pas, Lenglet është paraqitur në 34 ndeshje me Atleticon. Ai shënoi tri herë dhe asistoi dy herë./GazetaExpress/