Mbappe në telashe: Hetim për pagesa të dyshimta ndaj policëve francezë

Futboll

Gazeta Express

16/07/2025 18:22

Një nga figurat më të ndritura të futbollit francez, Kylian Mbappé, është gjetur papritur në qendër të një hetimi administrativ që po zhvillohet nga Inspektorati i Përgjithshëm i Policisë Kombëtare (IGPN), e njohur ndryshe si “policia e policëve”.

Sipas raportimeve të publikuara nga Le Canard Enchaîné, pesë oficerë të njësisë speciale CRS, që kanë pasur për detyrë sigurinë e ekipit kombëtar të Francës, janë vënë nën hetim pasi kanë përfituar shuma të konsiderueshme parash nga llogaria personale e sulmuesit të Real Madridit.

Hetimet nisën pas një raporti të Tracfin, agjencia franceze që monitoron pastrimin e parave dhe financimin e terrorizmit. Sipas dokumenteve, katër brigadierë kryesorë kanë marrë nga 30 mijë euro secili, ndërsa shefi i tyre, një komandant me rol të rëndësishëm në mbikëqyrjen e të tjerëve, ka përfituar 60,300 euro, duke e çuar totalin në 180,300 euro, shuma që kanë ngritur pikëpyetje serioze në institucionet shtetërore.

Mbappé, i cili e ka pranuar transferimin e këtyre parave, ka nënshkruar një deklaratë ku saktëson se bëhet fjalë për shpërblimin e tij nga pjesëmarrja në Kupën e Botës 2022, të cilin e kishte vendosur ta shpërndante mes pjesëtarëve të ekipit të sigurisë dhe disa shoqatave humanitare. Lojtari thotë se kishte marrë miratimin e avokatit të tij fiskal, i cili e kishte informuar se këto ishin “dhurata të zakonshme”, që nuk kërkonin deklarim për përfituesit.

Megjithatë, për autoritetet, pyetja thelbësore është nëse këto pagesa janë me të vërtetë dhurata apo, në të vërtetë, një formë pagesash për shërbime të mbrojtjes private, çka do të përbënte shkelje të detyrës për oficerët e shtetit. Ajo që i ka shtuar dyshimet është fakti se komandanti në fjalë thuhet se ka shoqëruar Mbappé-n në udhëtime personale, përfshirë një vizitë në Kamerun dhe një qëndrim në Vaucluse, gjatë verës së vitit 2023, aktivitete që nuk kanë lidhje me misionin zyrtar.

Vetë Mbappé ka deklaruar se është “i gatshëm të bashkëpunojë plotësisht” me hetuesit dhe të sqarojë çdo dyshim mbi veprimet e tij.