Man Utd i hiqet privilegji para finales së Europa League kundër Spurs

Futboll

Gazeta Express

09/05/2025 16:39

Manchester United dhe Tottenham Hotspur do të përballen në finalen e Europa League, por një ndryshim i rëndësishëm në orarin e ndeshjeve i ka hequr United një avantazh të konsiderueshëm para kësaj sfide.

United mposhti Athletic Bilbaon me rezultat 4-1 në Old Trafford të enjten, duke u kualifikuar në finale me rezultat të përgjithshëm 7-1.

Ndërkohë, Tottenham kaloi kampionët norvegjezë Bodo/Glimt me rezultat të përgjithshëm 5-1, duke fituar ndeshjen e kthimit 2-0 në udhëtim.

Kjo do të jetë hera e tretë në histori që dy klube angleze përballen në një finale të Europa League dhe hera e parë që nga viti 2018.

Finalja ka një rëndësi të veçantë këtë sezon, pasi për të dyja skuadrat është mundësia e vetme për të siguruar pjesëmarrjen në garat evropiane sezonin e ardhshëm përmes kualifikimit në Ligën e Kampionëve si fituese të Europa League.

Para finales, Premier League është detyruar të bëjë një ndryshim të rëndësishëm në kalendar, i cili më parë i favorizonte Manchester United.

United do të luajë kundër Chelseat në Stamford Bridge të premten, më 16 maj, ndërsa fillimisht Spurs do të udhëtonin për të përballuar Aston Villën të dielën, më 18 maj.

Ky orar do t’i linte Tottenhamit dy ditë më pak pushim krahasuar me United para finales në Bilbao, e cila do të zhvillohet të mërkurën, më 21 maj.

Premier League ka konfirmuar tashmë se ndeshja e Spurs është zhvendosur për të premten, me fillim në orën 19:30, dhe kjo datë tashmë është bërë zyrtare pas kualifikimit të tyre në finale.

Ndërkohë, ndeshja e United ndaj Chelseat është zhvendosur për më vonë në të njëjtën ditë, me fillim në orën 20:15.

Një deklaratë zyrtare lexon:

“Ndeshja e Premier League mes Aston Villa dhe Tottenham Hotspur është caktuar për të premten, më 16 maj, me fillim në orën 19:30 BST.

Kjo pas kërkesës nga Spurs në kuadër të pjesëmarrjes së mundshme në finalen e UEFA Europa League më 21 maj.

Gjithashtu, ndeshja mes Chelseat dhe Manchester United, e cila po ashtu zhvillohet të premten, më 16 maj, do të nisë në orën 20:15 BST.”

Sipas Daily Mail, drejtuesit e Aston Villas janë shprehur të “zemëruar” që ndeshja e tyre u zhvendos, pasi skuadra e tyre ende është në garë për kualifikimin në Ligën e Kampionëve për sezonin e ardhshëm.

Finalistët e këtij sezoni të Ligës së Kampionëve do të kenë tani vetëm gjashtë ditë mes ndeshjes kundër Spurs dhe asaj ndaj Bournemouth më 10 maj – në vend të tetë ditëve që kishin planifikuar fillimisht.

Drejtori i Aston Villa, Damian Vidagany, deklaroi:

“Sinqerisht, nuk jemi të kënaqur.

Shpresoj që në të ardhmen të gjithë do ta kujtojnë këtë padrejtësi të qartë ndaj tifozëve të Villas dhe të jenë po aq të kujdesshëm dhe mbështetës nëse ne do të kemi nevojë për ndryshime për të na ndihmuar në Evropë (nëse shpresojmë se do të jemi aty). Nuk e kemi ndjerë këtë mbështetje as sezonin e kaluar, as këtë. Futbolli evropian nuk është sfidues vetëm për klubet angleze kur janë pranë finales.” /GazetaExpress/