Mafiozi turk u vra për një video erotike nga shqiptari Elvis Simoni

Lajme

Gazeta Express

21/09/2025 14:01

Agimi i 23 korrikut. Një vajzë me flokë të shkurtër bionde, tatuazhe në krahë e këmbë dhe një kurorë të stampuar poshtë qafës, i shkruan në WhatsApp një miku: “Jam edhe e dobët edhe e fortë.” Ajo i rrëfehet burrit që e thërret “dashuri”, të cilin e pret në shtëpinë ku jeton me bashkëshortin. Mesazhi tingëllon si një rrëfim: “Kisha frikë të ndieja mëshirë, por nuk… kur i hodha sytë, ishte vetëm për të parë nëse do të ndieja diçka, por asgjë.”

Më pak se tre orë më parë, Hayati Aroyo, 62 vjeç, me origjinë turke dhe i lidhur ngushtë me botën kriminale të vendit të tij, ishte vrarë para syve të Valentina Peronit. Ai u godit me thikë tridhjetë herë në një apartament në Sesto San Giovanni, në verilindje të Milanos, dhe më pas iu vu flaka në një përpjekje për të zhdukur gjurmët.

Sipas urdhrit të arrestit të lëshuar nga prokurori i Monzës, Marco Giovanni Santini, autorët e asaj masakre ishin Valentina, 36 vjeç, bashkëshorti i saj 38-vjeçar, Emanuele Paganini, dhe shqiptari Elvis Simoni, 33 vjeç, një mik i ngushtë i çiftit. Ishte pikërisht ky i fundit që, natën e 23 korrikut, e sulmoi i pari Aroyon, një goditje në zemër, përpara se ta hidhte trupin mbi shtrat, t’i hidhte zbardhues dhe më pas t’i vinte zjarrin, duke shkatërruar pothuajse tërësisht apartamentin e një studenti, të cilin viktima e kishte marrë me qira për një muaj.

Vetë Elvisi, i arrestuar teksa planifikonte arratisjen drejt Kroacisë nga oficerët e Njësisë së Vrasjeve të Skuadrës Fluturuese, të udhëhequr nga Alfonso Iadevaia dhe Francesco Giustolisi ka zbuluar edhe motivin e një brutaliteti të tillë: një video erotike me shoqen e tij Valentina, të cilën Aroyo e kishte ruajtur në një tablet, i cili u grabit bashkë me para, një celular dhe tre karta krediti. Vetëm një ditë pas vrasjes, më 24 korrik, Peroni dhe një mik i saj i palidhur me krimin kishte përdorur një nga kartat e vjedhura në një makinë lojërash fati në Busto Arsizio: një pistë kyçe për hetuesit.

Në sfond qëndron një rrjet droge dhe festash të organizuara nga Aroyo, kunati i një prej krerëve të krimit turk, Huseyin Sarai, i cili u vra para syve të tij në Crotone më 31 janar 2005. Sipas akuzës, edhe treshja e dyshuar për vrasjen kishte marrë pjesë në këto festa të mbushura me kokainë dhe substanca sintetike. Plani i ekzekutimit u ndërtua duke përdorur gruan si karrem: Valentina e futi viktimën në banesë dhe më pas hapi derën për bashkëpunëtorët.

Gjurmët e lëna ishin të shumta: taksia e paguar nga Aroyo që të sillte Valentinën, celularët e çiftit që u sinjalizuan në antenat mes Busto Arsizio-s dhe Sestos, dëshmia e një fqinjeje që pa Elvis Simonin teksa dilte nga apartamenti, si edhe pamjet e kamerave të sigurisë që filmuan një Peugeot 107 të parkuar pranë, i drejtuar nga një mik i Peronit. Në fund, edhe mesazhet me tekst e tradhtuan autorët. Në një bisedë, Elvisi ishte treguar i ashpër: “Jam mirë, nuk është hera e parë.” Por disa ditë më vonë, ndërsa kërkonte informacion për viktimën, Valentina pranoi një parandjenjë: “Sidoqoftë, kam një parandjenjë të keqe” Ajo nuk gabohej../La Repubblica