Lukaku zbulon ‘rolin’ në transferimin e De Bruyne te Napoli: I shpjegova gjithçka, bëri zgjedhjen e duhur

Sport

Gazeta Express

23/06/2025 20:01

Romelu Lukaku ka konfirmuar se ka pasur një rol vendimtar në bindjen e bashkëkombësit të tij, Kevin De Bruyne, për t’iu bashkuar Napolit këtë verë. Mesfushori belg do të transferohet te kampionët e Italisë si lojtar i lirë nga Manchester City, pas përfundimit të kontratës me klubin anglez.

Në një intervistë për gazetën belge Het Laatste Nieuws, Lukaku tregoi se kishte zhvilluar disa biseda me De Bruyne gjatë angazhimeve me përfaqësuesen dhe jashtë saj. “Kam folur me të disa herë dhe i shpjegova si funksionojnë gjërat te Napoli,” tha sulmuesi belg. “Jam shumë i lumtur që po na bashkohet. Kevin është pikërisht ajo që na nevojitet për të hedhur hapin tjetër. Nuk duam vetëm ta mbrojmë titullin – duam të përmirësohemi.”

Napoli u shpall kampion i Serie A vetëm në javën e fundit të sezonit, duke e mbyllur kampionatin me një pikë më shumë se Interi. Lukaku kishte një rol kyç në suksesin e klubit, duke shënuar 14 gola dhe asistuar 10 herë në 36 ndeshje.

Lukaku shtoi më tej: “Folëm edhe gjatë grumbullimeve me kombëtaren. Më telefonoi një herë për të më pyetur për detaje praktike. I tregova ku mund të gjente shtëpi dhe çfarë të priste në qytet. Bashkë me Dries Mertens bëmë çmos për ta bindur dhe jam i bindur që Kevin bëri zgjedhjen e duhur.”

Sulmuesi belg theksoi edhe dallimet mes futbollit anglez dhe atij italian: “Një lojtar i Napolit merr shumë dashuri. Jam i lumtur që Kevin do ta përjetojë këtë. Futbolli në Itali është i pakrahasueshëm – pasioni këtu është i veçantë. Por ka edhe anën tjetër të medaljes… Kam qenë në klube ku tifozët paraqiteshin në stërvitje kur gjërat nuk shkonin mirë. Nuk është e këndshme, por të bën të kuptosh që duhet të japësh maksimumin çdo ditë.”

De Bruyne e mbylli sezonin 2024-25 me një formë të luhatshme për shkak të dëmtimeve dhe mungesës së ritmit te Manchester City, por gjithsesi arriti të kontribuojë me katër gola dhe shtatë asistime në Premier League. Tashmë, ai nis një kapitull të ri në karrierën e tij me Napolin, nën shoqërinë e Lukakut dhe në një ambient ku pritet të mirëpritet me entuziazëm.