Luis Enrique ka një kërkesë të veçantë për sezonin e ri

Sport

Gazeta Express

14/06/2025 11:17

Me sezonin më të suksesshëm në historinë e fundit të PSG-së ende të freskët – kampionë të Ligue 1, Kupës dhe Ligës së Kampionëve – Luis Enrique tashmë po mendon për mënyrën si ta përforcojë skuadrën.

Ai ka një prioritet të qartë: të nënshkruajë me një qendërmbrojtës të nivelit të lartë.

Trajneri spanjoll i ka kërkuar bordit një mbrojtës që jo vetëm ta plotësojë Marquinhosin, por që të jetë gjithashtu gati të marrë udhëheqjen e repartit në të ardhmen e afërt.

Në këtë kontekst, emri që ka fituar më shumë terren është ai i ukrainasit Illya Zabarnyi. Zabarnyi, një shtyllë e Bournemouth në Premier League nën drejtimin e Andoni Iraolës, ka qenë një nga mbrojtësit e rinj më të qëndrueshëm këtë sezon.

Paraqitjet e tij nuk kanë kaluar pa u vënë re në Paris, ku ai shihet si një investim i sigurt afatgjatë. Luis Enrique madje ka pasur edhe kontakte të drejtpërdrejta me lojtarin, duke i shprehur interesimin e tij.

Pengesa kryesore mbetet çmimi: klubi anglez e vlerëson atë në 70 milionë euro, një shumë e konsiderueshme që mund të pengojë marrëveshjen.

Ndërkohë, PSG ka marrë parasysh edhe alternativa të tjera. Mario Gila, që po luan mirë te Lazio, ishte një opsion i vlefshëm, por me ardhjen e Maurizio Sarrit në pankinën e kryeqytetasve italianë, largimi i tij duket i pamundur. Gila do të jetë një element kyç i projektit të ri në “Olimpico”.

Nevoja për të rinovuar mbrojtjen në Paris është e qartë. Luis Enrique, i cili e ka bazuar suksesin e skuadrës në kohezionin taktik dhe ekuilibrin mbrojtës, e di se përforcimi i këtij reparti është thelbësor për të ruajtur nivelin e lartë të konkurrencës. Merkatoja është në lëvizje, dhe PSG po lëviz me ambicie. Emra të tjerë në radar nuk përjashtohen.