Lookmani i shpallë ‘luftë’ Atalantas, nuk shkon në stërvitje

Sport

Gazeta Express

04/08/2025 19:30

Kapitulli më i fundit në përplasjen mes Ademola Lookman dhe Atalanta-s ka ndodhur sot, pasi lojtari nuk u paraqit në stërvitje, duke tentuar të forcojë kalimin e tij te Interi.

Marrëdhënia mes lojtarit dhe klubit ka arritur në pikën më të ulët dhe situata duket se është në prag shpërthimi. Sipas disa burimeve, Lookman pritej sot në qendrën stërvitore të Zingonia-s për angazhimet e parasezonit, por nuk u shfaq.

Ky veprim vjen pas një deklarate të gjatë që ai publikoi në Instagram, ku akuzoi Atalanta-n për “premtime të thyera” dhe konfirmoi se kishte dorëzuar një kërkesë zyrtare për transferim.

La Dea reagoi përmes CEO-s Luca Percassi, i cili theksoi se megjithëse i kishin premtuar lojtarit shitje këtë verë nëse vinte një ofertë e përshtatshme, kjo do të ishte vetëm për një klub jashtë Italisë dhe jo për rivalët direkt në Serie A, Interin.

Mungesa e sotme në stërvitje pritet ta përshkallëzojë edhe më tej situatën, ndërkohë që Inter shpreson ta bindë Atalanta-n duke rritur ofertën në 42 milionë euro plus 3 milionë bonuse.

Ky gjest e bën të qartë se veprimet e Lookman po bëhen gjithnjë e më agresive dhe mbetet për t’u parë si do të reagojë klubi. Sulmuesi 27-vjeçar është aktualisht nën kontratë me Atalanta-n deri në qershor 2027./GazetaExpress/