Liverpooli kthehet në fushë pas tragjedisë, ceremonia e veçantë për dy vëllezërit

Futboll

Gazeta Express

11/07/2025 13:20

Liverpooli dhe Preston North End kanë zbuluar një sërë homazhesh prekëse që do të organizohen për të nderuar kujtimin e Diogo Jotës dhe vëllait të tij, Andre Silva, para ndeshjes miqësore të së dielës në Deepdale.

Kjo do të jetë hera e parë që “The Reds” zbresin në fushë pas humbjes tragjike të dy vëllezërve më 3 korrik. Tifozëve që do të jenë të pranishëm në stadium u kërkohet të ulen në vendet e tyre deri në orën 14:45, përpara nisjes së ndeshjes në orën 15:00, si shenjë respekti për dy vëllezërit, ndërkohë që homazhet do të fillojnë rreth orës 14:50.

Claudia Rose Maguire, bashkëshortja e ish-lojtarit të Preston, Sean Maguire, do të hapë ceremoninë me një interpretim emocionues të këngës Can’t Help Falling In Love, pasuar nga himni i Liverpoolit You’ll Never Walk Alone.

Teksa tingujt e këtij himni do të përshkojnë stadiumin, kapiteni i North End, Ben Whiteman, do të vendosë një kurorë me lule përpara tifozëve mysafirë në tribunën Bill Shankly Kop, përpara se të mbahet një minutë heshtje pak çaste para fillimit të ndeshjes.

Gjatë kësaj heshtjeje prekëse, ekranet gjigante dhe panelet LED të stadiumit Deepdale do të ndriçohen me mesazhe dhe dedikime për dy vëllezërit, raporton Liverpool Echo.

Për më tepër, të dyja skuadrat do të mbajnë shiritë e zinj në krah si shenjë zie për sulmuesin e Liverpoolit Jota dhe Silvën, i cili luajti për Penafiel.

Preston ka përgatitur gjithashtu një edicion special të programit të ndeshjes, me dedikime të shkruara për Jotën dhe Silvën.

Programi 16-faqësh, i dedikuar plotësisht dy vëllezërve, do të shpërndahet falas për të gjithë mbajtësit e biletave në stadium, me shumë punonjës që do t’i ndajnë programet përreth tribunave.