Liverpooli e bën gati ofertën prej 100 milionë paund për yllin e Premierligës

Sport

Gazeta Express

15/06/2025 16:20

Arne Slot mund të jetë duke u përgatitur për një tjetër ofertë gjigante prej 100 milionë paundësh për të rindërtuar skuadrën e tij, vetëm disa ditë pas finalizimit të marrëveshjes për Florian Wirtz.

Pas një viti të qetë në tregun e transferimeve nën drejtimin e Slot, duket se Liverpool është gati të shpenzojë shumë gjatë verës, teksa trajneri holandez synon të rinovojë skuadrën fituese të Premier League për sezonin e ardhshëm.

Mbrojtësi i Bayer Leverkusen, Jeremie Frimpong, ishte lojtari i parë që iu bashkua “The Reds” si zëvendësues për Trent Alexander-Arnold, ndërsa një marrëveshje rekord në Premier League për Wirtz pritet të shpallet në ditët në vijim.

Por rindërtimi i Slot nuk pritet të ndalet këtu, pasi klubi besohet se është duke shënjestruar disa lojtarë të tjerë të mëdhenj, përfshirë yllin e Bournemouth, Milos Kerkez, dhe një tjetër futbollist të Premier League me vlerë rreth 100 milionë paundësh.

Sipas një raporti nga The Sun, Liverpool po shqyrton mundësinë për të rikthyer interesin për anësorin e Newcastle United, Anthony Gordon, mes pasigurive mbi të ardhmen e Luis Diaz.

Raportime të mëparshme sugjeronin se, nëse Diaz largohet këtë verë drejt Barcelonës apo një klubi tjetër, anësori i PSG-së, Bradley Barcola, do të ishte zgjedhja e parë e Slot.

Megjithatë, tani besohet se kampionët e Ligës së Kampionëve duan ta mbajnë francezin, duke e shtyrë Liverpoolin të kthejë vëmendjen nga Gordon, i cili është diplomuar në akademinë e Everton dhe është lidhur disa herë me një transferim te Anfield.

Por një lëvizje për 24-vjeçarin nuk do të jetë e lirë, pasi ai vlerësohet shumë nga trajneri Eddie Howe dhe drejtuesit e Newcastle.

Që nga transferimi i tij nga Everton për 45 milionë paund në janar 2024, Gordon – lindur në Liverpool – është kthyer në një lojtar kyç për skuadrën e Howe, duke shënuar 22 gola dhe asistuar 26 të tjerë në 106 paraqitje në të gjitha kompeticionet.

Megjithëse çmimi i Gordon nuk pritet të jetë problem për Liverpoolin, sidomos duke pasur parasysh se të paktën një mes Diaz, Darwin Nunez, Federico Chiesa dhe Diogo Jota pritet të largohet gjatë muajve në vijim.

Dhe nëse transferimi realizohet, besohet se Newcastle mund të kërkojë ta zëvendësojë Gordonin me një huazim të Jack Grealish nga Manchester City./GazetaExpress/