Ligjëruesit e edicionit të ri të Seminarit Ndërkombëtar për Gjuhën, Sislej Xhafa kthehet pas 47 viteve

Arte

Gazeta Express

14/08/2024 15:53

Seminari Ndërkombëtar për Gjuhën, Letërsinë dhe Kulturën Shqiptare do të filloj punimet më 19 gusht, duke shënuar këtë vit 50 vjetorin e themelimit. Në programin e ligjëratave që mbahen në kuadër të Seminarit, përfshihen studiues nga brenda e jashtë Kosovës. Sislej Xhafa njëri ndër të ftuarit e këtij edicioni kthehet në Seminarin e Prishtinës pas 47 viteve.

Sislej Xhafa, i lindur në Pejë (1970), është artist kosovar me famë botërore.

Me residencë në New York, ai ka ekspozuar në Amerikë, Japoni, Francë, Itali, Gjermani, Poloni, Angli etj, duke prezentuar para botës idetë e tij artistike të lidhura me situatën ekonomike, politike dhe sociale të shoqërisë ku jetojmë. Është themelues i Institutit për Art Bashkohor ARKIV në Pejë.

Në mars të vitit 2022, Xhafa u zgjodh akademik nderi i Akademisë së Arteve të Bukura të Firencës. Në Seminar, do të flasë për temën ‘Arti kosovar në Botë”, më 22 gusht nga ora 12:30. Në Seminarin e Prishtinës kthehet pas 47 viteve.

Phil Hubbard është ligjërues i lartë Emeritus në Univerzitetin e Stanfordit, ku ka qenë Drejtor i Programit të Gjuhës Angleze për Studentët e huaj (2003-2020).

Nga viti 1976-1980 shërbeu si asistent kërkimor i profesorit Leonard Newmark në Projektin UCSD për Gjuhën Shqipe.

Në vitin 1977 ka ndjekur Seminarin e Albanologjisë, kurse dizertacionin e doktoraturës në vitin 1980 e punoi për temën Sintaksa e kompleksit foljor të shqipes.

Ai është bashkautor i librave Shqipja e folur (1980) dhe Shqipja Standarde: Gramatikë referuse për studentët (1983). Në Seminar, Hubbard do të flasë për temën “Memories of the 1977 seminar: How it influenced my lifes path”, më 30 gusht nga ora 09:00.

Ranko Matasović është profesor në Univerzitetin e Zagrebit, në Fakultetin e Shkencave Humane dhe Sociale, aty edhe ku ka përfunduar studimet për gjuhësi dhe filozofi.

Me ftesë ka ligjëruar në Univerzitetin e Vjenës, Oksfordit, Leidenit e Heidelbergut. Në Zagreb ligjëron kurset e gjuhësisë Indo-Evropiane, gjuhëve kelte dhe tipologjisë gjuhësore. Mban titullin akademik nga Akademia e Shkencave dhe Arteve e Kroacisë.

Në Seminar do të flasë për temën “Latin Loanwords in Albanian: Problems of Relative Chronology”, më 27 gusht nga ora 11:00.

Yll Rugova (1984) është dizajner grafik, tipograf dhe studiues i historisë së tipografisë. Studimi i tij ka në fokus historinë e tipografisë shqiptare dhe alfabeteve origjinale. Ka mbaruar studimet në nivelin baçelor dhe master në dizajn grafik pranë Fakultetit të Arteve, Universiteti i Prishtinës.

Ka qenë drejtor i Drejtorisë për Kulturë në Komunën e Prishtinës dhe zëvendësministër për Kulturë Rini dhe Sport në Qeverinë e Kosovës. Është themelues i hapësirës ekspozuese për artet pamore Motrat në Prishtinë dhe i platformës Prishtina në Histori. Ushtron veprimtarinë profesionale kreative edhe përmes grupit të dizajnit Trembelat.

Është kreatori i logos së Seminarit të 50-të.  Në Seminar do të flasë për temën “Alfabeti më i vjetër origjinal i shqipes: në dritën e një burimi të ri”, më 21 gusht nga ora 11:00.

Brian D.Joseph është gjuhëtar i specializuar për gjuhësinë historike dhe studiues i njohur në përmasa ndërkombëtare. Mban titullin profesor i Shquar (𝑑𝑖𝑠𝑡𝑖𝑛𝑔𝑢𝑖𝑠ℎ𝑒𝑑) në Univerzitetin e Ohaios.

Ka studiuar për gjuhësi të përgjithshme dhe gjuhët klasike në Univerzitetin e Jelit dhe u doktorua në Univerzitetin e Harvardit.

Është anëtar dhe kryetar i Shoqatës së Linguistëve të Amerikës, anëtar i Akademisë së Arteve dhe Shkencave të Amerikës si dhe anëtar i jashtëm i Shkencave dhe Arteve të Kosovës.

Në Seminar do të flasë për temën “Geography and language: A tale of two villages”, më 29 gusht nga ora 10:30.

Seminari mbahet nga 19 deri më 30 gusht dhe diskutimet mbahen në sallën “Idriz Ajeti”, në Fakultetin e Filologjisë.

/Express