Liga e Kampionëve: Interi eliminohet pas humbjes nga Barça, kualifikohet Dortmundi

Gazeta Express

10/12/2019 22:57

Inter është eliminuar nga faza grupore në Ligën e Kampionëve, pas humbjes 2:1 në shtëpi nga Barcelona në ndeshjen e fundit në grup, duke i dhënë mundësi Borussia Dortmundit të kalojë në mesin e 16 skuadrave më të mira pas triumfit 2:1 ndaj Slavia Pragës.

Barcelona si fituese e Grupit F dhe Dortmundi si e dyta kualifikohen në 1/8 e finales, ndërkohë Interi si e treta do të luajë në Ligën Evropës – garën dytësore evropiane – dhe Slavia Praga si e fundit shkon në shtëpi, raporton Gazeta Express.

Inter 1:2 Barcelona

Interi e priti Barcelonën në San Siro, duke e ditur se vetëm fitorja do t’ia shmangte eliminimin nga Liga e Kampionëve, por zikaltrit u mposhten nga një Barcelonë e përgjysmuar.

Carles Perez dhe Ansu Fati, dy lojtarët e akademisë, shënuan dy golat e fitores së skuadrës së Ernesto Valverdes që udhëtoi drejt Milanos pa shumë yje, përfshirë kapitenin Lionel Messi.

Romelu Lukaku i dha shpresë Interit me golin e tij të bukur në përfundim të pjesës së parë, por kjo ishte e gjitha që skuadra e Antonio Contes mundi të ofrojë mbrëmjen e së martës.

Barcelona e siguroi kualifikimin një xhiro para fundit si fituese e Grupit F.

Inter përfundoi i treti prapa Borussia Dortmundit dhe tani do të luajë në Ligën e Evropës.

Borussia Dortmund 2:1 Slavia Praga

Dortmundi me një lojtar më pak për rreth një çerek lojë e mundi 2:1 Slavia Pragën, duke shpresuar se Interi do të humbiste apo barazonte ndaj Barcelonës, në mënyrë që ta sigurojë kalimin në 1/8 e finales në Ligën e Kampionëve.

Ashtu edhe ndodhi, pasi Interi u mund 2:1 nga Barcelona në San Siro.

Jadon Sancho dhe Julian Brandt shënuan dy golat e fitores së madhe të Dortmundit.

Dortmundi kualifikohet si e dyta nga Grupit F, ndërkohë që Slavia Praga eliminohet nga garat evropiane si e fundit në grup. /Gazeta Express/