Letra e Trump për Osmanin, ish-këshilltarja e saj e sheh si “sinjal të qartë” nga Washingtoni

Lajme

Gazeta Express

21/04/2026 10:48

Ish-këshilltarja e Vjosa Osmanit për letrën e dërguar nga presidenti amerikan për ish-presidenten Osmani në fund të mandatit të saj, tha se e sheh si “sinjale të qarta nga Washingtoni” për lidershipin e saj.

Sipas Haradinajt, vlerësimi nga SHBA është dëshmi se Kosova “është tashmë një kontribuuese aktive në promovimin e paqes dhe stabilitetit global” dhe se udhëheqja e Osmanit është faktor që “merret seriozisht”.

“Garanca amerikane për Kosovën tonë do të ruhet dhe do të mbetet busull e qëndrueshme për të ardhmen, duke orientuar shtetin tonë drejt sukseseve të reja dhe duke forcuar çdo hap në shërbim të popullit të saj”, tha ndër të tjera ajo.

Postimi i plotë:

SINJALE TË QARTA NGA WASHINGTONI

Ka momente në jetën publike që shkojnë përtej protokollit diplomatik dhe rikujtojnë forcën e aleancave që formësojnë të ardhmen e një vendi.

Letra e Presidentit amerikan Donald J. Trump për Presidenten Vjosa Osmani riafirmon qartë partneritetin strategjik ndërmjet Kosovës dhe Shteteve të Bashkuara të Amerikës.

Rruga e Kosovës është e lidhur ngushtë me aleatët që qëndrojnë në krah të lirisë, sovranitetit, dhe vlerave demokratike. Është e lidhur ngushtë me Amerikën. Vlerësimi për lidershipin e Presidentes Osmani dëshmon se Kosova është tashmë një kontribuuese aktive në promovimin e paqes dhe stabilitetit global. Është faktor që merret seriozisht në tavolinat ku përcaktohen drejtimet e mëdha gjeopolitike – siç ishte puna e Presidentes me Bordin e Paqes dhe mundësia historike për të dërguar ushtrinë tonë në Gaza, duke e rreshtuar me ushtrinë amerikane.

Garanca amerikane për Kosovën tonë do të ruhet dhe do të mbetet busull e qëndrueshme për të ardhmen, duke orientuar shtetin tonë drejt sukseseve të reja dhe duke forcuar çdo hap në shërbim të popullit të saj.