“Letra e Bërnabiq nuk është tërhequr”, Bislimi deklaron se Lajçak deshi të thoshte diçka tjetër në Prishtinë

Lajme

Gazeta Express

17/09/2024 17:06

Zëvendëskryeministri Besnik Bislimi sot pas takimit që pati në Bruksel në kuadër të dialogut me emisarin Miroslav Lajçak tha se nuk është tërhequr letra e ish-kryeministres serbe, Ana Bërnabiq, drejtuar shteteve anëtare ku thotë se Serbia është tërhequr nga Marrëveshja e Ohrit.

Sipas Bislimit, Lajçaku “konfirmoi sot se ai donte të thoshte se Serbia po punon për ta tërhequr atë letër” dhe se ajo nuk është tërhequr.

Gjatë vizitës së fundit që Lajçak pati në Kosovë në një deklarim për media kishte thënë se letra e Bërnabiqit është tërhequr.

“Marrëveshja e Ohrit është ligjërisht e obligueshme dhe jemi duke punuar në implementim. Asnjëra palë nuk është tërhequr nga kjo marrëveshje”.

“Letra është tërhequr. Ka deklarata këtu e atje që nuk ndihmojnë fare, por marrëveshja si e tillë është e vlefshme në tërësinë e saj dhe përtej kësaj, marrëveshja është bërë pjesë e rrugës evropiane të Kosovës dhe Serbisë”, kishte thënë ai.

Në Serbi këtë deklaratë të Lajçakut as s’e kishin mohuar as pohuar.

Tërheqja e letrës nga Bërnabiq është kërkesë e Qeverisë së Kosovës për nisjen e zbatimit të marrëveshjes së Ohrit./Express/