Leonardo DiCaprio zbuloi betejën me pneumoninë, ekspertët shpjegojnë pse ka kaq shumë raste të infeksionit potencialisht fatal të mushkërive

Keshilla Mjekësore

Gazeta Express

09/12/2025 19:40

Leonardo DiCaprio është ylli më i ri i Hollywood-it që është prekur nga pneumonia. Aktori ka zbuluar se ishte ende në fazë rikuperimi nga infeksioni i rëndë i mushkërive, ndërsa promovonte filmin e tij të fundit.

Sipas Time Magazine, e cila e shpalli 51-vjeçarin “Entertainer i Vitit 2025”, DiCaprio po “rikuperohej nga pneumonia” kur ata realizuan intervistën në tetor. Aktori, i njohur për privatësinë e tij, nuk dha shumë detaje se si u sëmur apo çfarë lloji pneumonia kishte kaluar. Ai foli më shumë për xhirimet e filmit të vlerësuar nga kritika One Battle After Another dhe për angazhimin e tij në çështjet e mjedisit.

DiCaprio përmendi edhe bashkëpunëtoren e tij të dikurshme, Diane Keaton, me të cilën luajti në Marvin’s Room. Keaton ndërroi jetë në tetor nga pneumonia, në moshën 79-vjeçare – afërsisht në të njëjtën periudhë kur DiCaprio po intervistohej nga Time.

“Ajo kishte të qeshur të jashtëzakonshme. Jehonë në gjithë setin. Të bënte të ndiheshe si njeriu më humoristik në botë,” tha DiCaprio. “Unë jetoja për ta bërë të qeshë çdo ditë në xhirime. Ishte magjike.”

Në prill të këtij viti, pneumonia u listua edhe si shkaku i vdekjes së aktorit Val Kilmer, 65 vjeç. Së fundmi, pronari i një bari në Ibiza, Wayne Lineker, 63 vjeç, i shqetësoi ndjekësit kur tregoi se ishte shtruar në spital për të njëjtën arsye.

Ekspertët thonë se mosha nuk është rastësi. Pneumonia është cilësuar historikisht si “miku i vjetër i plakut”, për shkak të numrit të lartë të të moshuarve që humbin jetën nga kjo sëmundje.

Pse ka rritje të rasteve? Ekspertët paralajmërojnë për kombinimin e rrezikshëm me gripin

Pneumonia prek qeset mikroskopike të ajrit në mushkëri (alveolat), duke shkaktuar vështirësi në frymëmarrje, kollë të rëndë, madje edhe gjakderdhje në raste ekstreme. Në situata të rënda, pacientët përfundojnë në ventilator duke luftuar për jetë.

Sipas shifrave të ONS, në Angli dhe Uells gjatë vitit 2024 u regjistruan 23,061 vdekje ku gripi dhe pneumonia – të cilësuara së bashku që nga viti 2020 – u shënuan si shkak kryesor.

Profesori Paul Hunter nga Norwich Medical School shpjegon se gripi dhe pneumonia lidhen ngushtë:

“Pneumonia pneumokokale është e shkaktuar nga një bakter, i cili shpesh godet personin pasi ka kaluar gripin. Nuk vdesin shumë nga gripi direkt, por nga pneumonia që zhvillohet ndërkohë që trupi po rikuperohet nga gripi”, tha ai.

Virusi i gripit dëmton qelizat me qime mikroskopike (ciliet) që pastrojnë rrugët e frymëmarrjes, duke lejuar bakteret të depërtojnë në alveola. Pasi ato infektohen, mbushen me lëngje, gjak ose qelb – duke penguar oksigjenimin e gjakut.

Popullata e plakur dhe vala e “gripit mutant”: rreziku mbetet i lartë

Britania po përballet me një popullsi gjithnjë e më të moshuar dhe një valë të re gripi të mutuar, që e rrit ndjeshëm rrezikun e pneumonisë.

Dr. Simon Clarke, profesor i mikrobilogjisë qelizore në Universitetin e Reading, thotë:

“Po jetojmë më gjatë, por në gjendje më të brishtë. Të moshuarit kanë sistem imunitar më të dobët dhe janë më pak aktivë – kjo i bën më të rrezikuar nga pneumonia.”

Faktorë të tjerë rreziku përfshijnë intubimin gjatë operacioneve, mungesën e aktivitetit fizik dhe ekspozimin ndaj baktereve dhe viruseve që trupi nuk arrin t’i largojë.

Pneumonia nuk shkaktohet vetëm nga bakteret ose viruset. Ajo mund të vijë nga:

tuberkulozi

gëlltitja aksidentale e të vjellave

mbytja në ujë (gati-mbytje)

infeksione fungale, si pneumocistoza tek personat me HIV apo sistem imunitar të dobësuar.

Pneumonia nuk është një sëmundje e vetme: është një “ombrellë” simptomash

Sipas Dr. Clarke:

“Pneumonia është një term i përgjithshëm për një infeksion të rëndë të pjesës së poshtme të mushkërive. Nuk është një sëmundje e vetme dhe nuk shkaktohet nga një mikrob i vetëm.”

Simptomat kryesore:

vështirësi në frymëmarrje

kollë e fortë

marrje fryme e pamjaftueshme

lodhje ekstreme

Në raste të rënda, pneumonia mund të çojë në sepsë, një infeksion i gjakut që mund të shkaktojë dështim të shumëfishtë të organeve dhe vdekje.

Trajtimi dhe rikuperimi: jo çdo rast kërkon shtrim në spital

Dr. Clarke thekson se sot ekzistojnë më shumë trajtime se kurrë më parë.

“Jo të gjithë pacientët me pneumoni duhet të shtrihen në spital. Varet nga shkaku dhe ashpërsia. Disa njerëz shërohen në shtëpi me pushim dhe antibiotikë.”

Në rastet kur infeksioni është i kombinuar – p.sh., grip plus infeksion bakterial – antibiotikët ndihmojnë trupin të forcohet që më pas vetë sistemi imunitar të luftojë virusin.

Edhe pse pneumonia është serioze, Dr. Clarke thotë se fama e saj si “urdhër vdekjeje” nuk është gjithmonë reale:

“Shumë njerëz mendojnë se pneumonia është gjithmonë fatale. Nuk është e vërtetë. Dhe nëse e kalon, nuk je domosdoshmërisht më i rrezikuar që ta marrësh përsëri – përveç nëse ke faktorë të tjerë rreziku.”

Kush është më i rrezikuar?

Disa faktorë nuk mund të shmangen, si mosha. Por të tjerë mund të përmirësohen:

pirja e duhanit

mbipesha

mungesa e aktivitetit fizik

Ndryshimet e stilit të jetesës janë thelbësore për të ulur rrezikun e rikthimit të pneumonisë. /GazetaExpress/