Legjenda e Milanit me fjalë të mëdha për dy prurjet e reja: Kanë sjellur lidership në skuadër

Futboll

Gazeta Express

29/09/2025 20:00

Legjenda e Milanit, Alessandro Costacurta, ka lavdëruar Luka Modric dhe Adrien Rabiot pas fitores së “Rossonerëve” ndaj Napolit, duke theksuar se të dy kanë sjellë një nivel të ri lidershipi për ekipin.

Në një intervistë për “Sky Sport”, përmes “PianetaMilan”, pas fitores 2-1 ndaj kampionëve të Scudetto të sezonit të kaluar, Costacurta tha:

“Mendoj se tani ka shumë lidership, më shumë se kurrë më parë. Po flasim për dy lojtarë me nivel ndërkombëtar”.

Luka Modric u bashkua me Milanin këtë verë si transferim i lirë, pasi kontrata e tij me Real Madridin kishte përfunduar.

Mesfushori 40-vjeçar ka qetësuar shqetësimet për moshën e tij me një nisje të fortë sezoni.

Ndërkohë, Adrien Rabiot iu bashkua skuadrës nga Marseille i Roberto De Zerbit në fazën përmbyllëse të merkatos verore.

Ish-lojtari i Juventusit ishte pezulluar nga klubi francez pas një përleshjeje në dhomën e zhveshjes me Jonathan Rowe, i cili gjithashtu u largua nga Marseille këtë verë për t’u transferuar te Bologna në Serie A./GazetaExpress/