Legjenda drejt rrënjëve: Messi mund të veshë sërish fanellën e Newell’s

Sport

Gazeta Express

04/02/2026 16:38

Lionel Messi mund të rikthehet aty ku gjithçka nisi. Sipas raportimeve të fundit nga mediat ndërkombëtare, legjenda e Barcelonës dhe Argjentinës ka arritur një “marrëveshje në parim” për t’u larguar nga Inter Miami dhe për t’u rikthyer te Newell’s Old Boys në fillim të vitit 2027.

Ylli argjentinas, i konsideruar gjerësisht si një nga futbollistët më të mëdhenj në historinë e lojës, ka një karrierë të jashtëzakonshme pas vetes: 792 gola në 973 paraqitje në nivel klubesh dhe 115 gola në 196 ndeshje me Argjentinën, duke fituar gjithçka që futbolli ofron, përfshirë tetë Topa të Artë.

Me Barcelonën, Messi fitoi 10 tituj të La Ligës, 7 Kupa të Mbretit, 4 Liga të Kampionëve, si dhe trofe të shumtë ndërkombëtarë, duke u shndërruar në ikonën më të madhe të historisë së klubit katalanas.

Në muajt e fundit kishte spekulime për një rikthim të mundshëm të tij në Evropë, madje edhe lidhje me Galatasarayn, ndërsa vetë Messi ka lënë të hapur pjesëmarrjen në Kupën e Botës 2026. “Shpresoj të jem aty, do të doja shumë, por nëse jo, do ta shikoj nga afër. Botërori është gjithmonë diçka e veçantë”, ishte shprehur ai.

Ndërkohë, zëvendëspresidenti i Newell’s Old Boys, Juan Manuel Medina, ka konfirmuar publikisht se klubi po punon për ta rikthyer Messin:
“Ne po punojmë që Leo të luajë për Newell’s në gjysmën e parë të vitit 2027. Gjithçka varet nga ajo çfarë mund t’i ofrojmë në aspektin infrastrukturor dhe projektit sportiv.”

Sipas TuttoMercatoWeb, marrëveshja do të ishte në formë huazimi gjashtëmujor, nga janari deri në qershor 2027, pas së cilës Messi do të rikthehej te Inter Miami, me të cilin ka kontratë deri në vitin 2028.

Raporti thekson se çështja kryesore ka qenë siguria e Messit dhe familjes së tij në qytetin e Rosarios, por presidenti i ri i klubit, Ignacio Boero, ka ndërmarrë hapa konkretë, duke bashkëpunuar edhe me guvernatorin e Santa Fe, Maximiliano Pullaro, për të garantuar qetësinë dhe sigurinë e yllit argjentinas.

Nëse realizohet, ky rikthim do të ishte një nga momentet më emocionale dhe simbolike në historinë e futbollit botëror. /GazetaExpress