Lefter Zhidru, përplasje me fqinjët gjatë karantinës, këto janë pamjet video - Gazeta Express

Shqiperi

Gazeta Express

25/09/2020 16:50

Lefter Zhidru, përplasje me fqinjët gjatë karantinës, këto janë pamjet video

Shqiperi

Gazeta Express

25/09/2020 16:50

Fqinjët e kanë përshkruar si problematik raportin e krijuar nga Lefter Zhidru me banorët e tjerë të pallatit apo edhe familjen e tij.

Ata tregojnë se ishin bërë shpesh dëshmitarë të sherreve të tij me bashkëshorten, gjë për të cilën kishte ardhur vazhdimisht edhe policia.

Sherri i fundit ishte dje, kur edhe ndodhi ngjarja e rëndë pasi Zhidru qëlloi me armë ndaj policisë duke lënë të plagosur dy persona, gjë e cila solli edhe ekzekutimin e tij nga RENEA.

Abcnews ka siguruar një video të prillit 2020, në të cilën është fiksuar momenti kur Lefter Zhidru me bashkëshorten e tij konfliktohen me disa djem të rinj të lagjes pasi 71-vjeçari kishte thirrur policinë me argumentin se ata bënin zhurmë.

I moshuari kishte njoftuar më herët policinë duke theksuar se disa të rinj të zonës, përfshirë edhe Arjan Kalemajn që ka filmuar videon, qendronin tek pallati i tij duke luajtuar letra dhe bërë zhurmë, gjë e cila shkaktonte shqetësim tek ata.

Në debat e sipër, ata shkëmbejnë kërcënime ndaj njeri-tjetrit. Zhidru i thotë policisë që t’i largojë të rinjtë, ndryshe do të merrej ai me ta, kurse Kalemaj i thotë 71-vjeçarit dhe bashkëshortes së i kishin ditët e numëruara.

Në debat ndërhyn edhe bashkëshortja e Lefter Zhidrut, e cila i kërkon Kalemajt të mos filmojë duke theksuar se ishin në proces gjyqësor bashkë.

Pas përplasjeve me të, fqinjët i janë drejtuar edhe kreut të Policisë së Shtetit me një peticion duke kërkuar marrjen e masave ndaj tij me frikën se gjatë konflikteve mund të ndodhë ndonjë vetëgjyqësi.

Kanë qenë të paktën dy e-maile që janë në drejtim të Veliut që kërkojnë marrjen e masave ndaj Zhidrut, por që nuk u reagua deri në ngjarjen e djeshme.

Lefter Zhidru u ekzekutua dje nga RENEA pasi iu përgjigj me breshëri automatiku thirrjeve të tyre për tu dorëzuar, ndërkohë që më herët kishte plagosur dy persona.