Lebron James e frymëzon LA Lakers drejt titullit të parë në NBA pas një dekade

Gazeta Express

12/10/2020 8:47

Los Angeles Lakers i ka dhënë fund pritjes një dekadëshe për ta fituar titullin e 17-të në NBA, pasi triumfoi 106:93 kundër Miami Heat për ta vulosur fitoren 4:2 në serinë finale.

Lojtari më i vlefshëm i finaleve (MVP) ishte Lebron James me kontribut të trefishtë, duke i shënuar 28 pikë, 14 kërcime dhe 10 asiste, ndërsa Anthony Davis dhe Rajon Rondo i shënuan nga 19 secili, transmeton Gazeta Express.

Me këtë triumf, Lakers e ka barazuar rekordin e Boston Celtics për më së shumti tituj në NBA.

Kjo fitore e Lakers vjen në një vit në të cilin ky ekip e humbi njërin prej legjendave të veta – Kobe Bryant.

Pesë herë kampioni i NBA – i cili e kaloi tërë karrierën në Lakers dhe i udhëhoqi ata drejt titullit të fundit më 2010 – vdiq bashkë me të bijën Gianna, pas rrëzimit të helikopterit me të cilin po udhëtonin në janar. /Gazeta Express/