Lamine Yamal pothuajse u largua nga Barcelona për vetëm 4.3 milionë funte vite më parë

Futboll

Gazeta Express

10/09/2025 21:39

Lamine Yamal, talenti 18-vjeçar dhe kandidat kryesor për Topin e Artë, ishte shumë afër një transferi surprizues nga Barcelona te një gjigant tjetër evropian, sipas një gazetari në Gjermani.

Yamal konsiderohet një nga favoritët për çmimin më të madh individual në futboll, pas performancave të jashtëzakonshme për klubin dhe përfaqësuesen e Spanjës, megjithëse është ende shumë i ri.

18-vjeçari tashmë është kampion i La Ligës me Barcelonën dhe fitues i Kampionatit Evropian me Spanjën, duke luajtur rol kyç në të dy triumfet. Ai është tashmë “guri i çmuar” i Barcelonës, por njëherë ishte afër një transferimi të leverdishëm te Bayern Munchen, një klub që luan rregullisht në Ligën e Kampionëve.

Sipas Christian Falk, redaktor i futbollit në tabloidin gjerman BILD, Bayern ishte në prag të nënshkrimit të kontratës me të riun për vetëm 4.3 milionë paund në vitin 2022.

Falk shpjegon në një libër të ri se Bayern kishte dërguar një delegacion në Madrid për të diskutuar një marrëveshje për Gavi – por Yamal ishte objektivi i vërtetë.

“[Hasan] Salihamidzic dhe [Marco] Neppe kishin gjithashtu një agjendë sekrete, të cilën synonin ta zbulojnë vetëm në takimin e tyre,” shkruan Falk.

Departamenti i skautëve të Mynihut prezantoi te drejtorët e Bayern me video të një tjetër klienti të Ivan de la Peña – një lojtar që kishte filluar stërvitjen profesionale në moshën 14-vjeçare. Lëvizjet sulmuese, trikimet dhe skenat e lojës që tregonte i riu Lamine Yamal i çmendën drejtuesit e Bayern. Ata kurrë nuk kishin parë një talent të tillë në atë moshë!

De la Peña u habit kur gjatë një darke, Bayern papritmas ndryshoi fokusin nga Gavi tek Lamine Yamal. Salihamidzic dhe Neppe shprehën dëshirën e madhe për të nënshkruar me lojtarin dhe donin të takonin menjëherë prindërit e tij. Agjenti i premtoi se do t’ua transmetonte interesin familjes së Yamal.

Yamal arriti nivelin e duhur para se Bayern të nënshkruante

Superagjenti Jorge Mendes mori më pas përfaqësimin e Yamal dhe raportohet se i tha Bayern se një tarifë prej 5 milionë eurosh mund të mbyllte marrëveshjen, por zhvillimi i shpejtë i lojtarit e bëri të pamundur transferimin.

“Talenti i Lamine Yamal nuk mund të fshihej më. Spanjolli u ngrit kaq shpejt sa vendimi për të investuar pesë milionë euro u largua nga duart e Bayern,” kujton Falk.

Në vitin 2025, Yamal ka nënshkruar një kontratë të re që mund ta mbajë te Barcelona deri në vitin 2031. Ai ka shënuar dy gola në tre ndeshje të La Ligës këtë sezon dhe ka arritur gjashtë gola ndërkombëtarë para se të mbushte 18 vjeç. /GazetaExpress/