Kushtrim Sadiku: Kërkoj falje për situatën e krijuar të enjten, kisha probleme shëndetësore

Lajme

Gazeta Express

13/04/2026 20:08

Gazetari i Kanal 10, Kushtrim Sadiku, i kërkon falje publikut për paraqitjen e tij në debatin e së enjtes.

Ai thotë se gjatë debatit kishte probleme shëndetësore duke mohuar ato që siç thotë ” po përfliten nëpër rrjete sociale”.

“Është njerëzore të gabohet dhe unë s’jam përjashtim”, shprehet ai.

Ai ka thënë se “terapia që është duke e marrë ndaj një sëmundjeje të lukthit dhe implantet e dhëmbëve ia kanë vështirësuar mënyrën e komunikimit”.

“Kjo më ka shkaktuar dhimbje dhe lodhje njëkohësisht, kombinim që nuk do t’ia dëshiroja askujt” ka shkruar Sadiku.

Reagimi i tij i plotë:

Të nderuar miq, fillimisht më lejoni të kerkoj falje për situatën e krijuar gjatë debatit të së enjtes.

Terapia që jam duke e marr në drejtimin e një sëmundjeje të lukthit, problem të cilin e kam për disa vite rresht dhe trajtimi i implanteve dentare ma kanë vështirësuar mënyrën e komunikimit. Kjo më ka shkaktuar dhimbje dhe lodhje njëkohësisht, kombinim që nuk do t’ia dëshiroja askujt.

Gjithçka tjetër që po përflitet nëpër rrjete sociale nuk është e vërtetë.

Edhe në një situatë të vështirësuar, jam përpjekur të mos e le emisionin pa e realizuar, siç kam bërë për 17 vjet rresht në TV, pa e humbur asnjë të vetëm, pavarësisht situatave të sëmundjeve apo vështirësive të ndryshme. Por, ja që në këtë rast doli një vlerësim jo i duhur.

Është njerëzore të gabohet dhe unë s’jam përjashtim.

Dua të nënvizoj respektin dhe peshën e madhe që Kosharja e ka për mua, fillimisht si një njeri i këtij vendi e pastaj edhe si gazetar. Kam realizuar dhjetëra emisione për Kosharen dhe jam shumë krenar për të gjitha ato.

Edhe një herë, shpreh keqardhje të thellë për këtë situatë të krijuar. E kuptoj kritiken dhe e vlerësoj mbështetjen tuaj. Nuk e mirëkuptoj stuhinë e llumit, por s’kam se si mos ta shoh që ajo ekziston, e drejtuar nga grupe te ndryshme ekstremistësh, grupe me motivacione politike, snajperistësh të rrjeteve sociale e dashakeqinjëve.

Insistoj se do të përpiqem maksimalisht të jem në krye të detyrës si autor i emisionit

Shihemi pas pak ne Politiko!