Kush janë 5 punonjësit e IT që “anashkaluan” sulmet kibernetike

Shqiperi

Gazeta Express

30/11/2022 11:17

Rudina Llagami, Albi Gjeka, Altin Sallaku, A.I., Igli Lubonja janë 5 punonjësit e IT pranë Departamentit të Administratës Publike (DAP) për të cilët Prokuroria e Tiranës ka kërkuar arrest shtëpie lidhur me sulmet kibernetike ndaj sistemeve shtetërore shqiptare. Të pestë, akuzohen për shpërdorim detyre.

Në një njoftim për mediat, organi i akuzës thotë se personat në fjalë, janë angazhuar në pozicionin IT pranë DAP gjatë të njëjtës kohë kur është implementuar dhe mirëmbajtur sistemi administrata.al.

“Punonjësit në fjalë janë angazhuar në pozicionin IT pranë DAP gjatë të njëjtës kohë kur është implementuar dhe mirëmbajtur sistemi administratë.al. Në rastin konkret, stafi IT pranë DAP mund dhe duhej të kërkonte raportim nga ana e operatorit ekonomik të kontraktuar prej DAP për implementimin dhe mirëmbajtjen e sistemit në kohë lidhur me gjendjen në të cilën ndodhej ky sistem, pavarësisht mungesës së dijenisë për mënyrën e zbatimit të kontratës për implementimin e sistemit administrata.al”, thuhet në njoftimin e Prokurorisë.

Prokuroria thotë se “në rast se këta punonjës, do të kishin vepruar në përputhje me urdhërimet e Rregullores së Sigurisë së Informacionit nr. 337/1 prot., datë 17.01.2022, dhe Rregullores së Brendshme të AKSHI-it duke kërkuar informacion dhe duke u azhornuar me antiviruset më të fundit të sistemit, atëherë do ishte zbuluar në sistemet e tyre virusi i cili ka hyrë fillimisht tek administrata.al në mënyrë që të bëhej e mundur neutralizimi i tij pa prekur sistemin e AKSHI-t”.

Për prokurorinë e Tiranës, personat në fjalë, të identifikuar nga vetë strukturat e AKSHI, me mosveprimet e tyre kanë sjellë pasoja të rënda dhe kanë konsumuar elementet e figurës së veprës penale të “Shpërdorimit të detyrës”.

Arrest shtëpie është kërkuar për:

A.I. – Specialist, Sektori i IT në Departamentin e Administratës Publike, Përgjegjës, Sektori i IT në Ministrinë e Brendshme;

Altin Sallaku – Përgjegjës, Sektori i IT në Departamentin e Administratës Publike, Përgjegjës, Sektori i IT në Drejtorinë e Përgjithshme të Burgjeve;

Rudina Llagami, – Specialist, Sektori i IT në Departamentin e Administratës Publike;

Igli Lubonja. – Specialist, Sektori i IT në Departamentin e Administratës Publike; dhe

Albi Gjeka – Specialist, Sektori i IT në Departamentin e Administratës Publike.

/Gazeta Express