Kush është Asim Munir, marshalli i preferuar i Trump nga Pakistani, i cili ka marrë rolin e ndërmjetësit midis SHBA-së dhe Iranit

Lajme

Gazeta Express

25/03/2026 18:50

Sky News ka hedhur dritë mbi rolin e Pakistanit si ndërmjetës mes SHBA dhe Iranit, duke u përpjekur t’i përgjigjet pyetjes pse ky shtet i Azisë Jugore po luan tashmë një rol kaq të rëndësishëm.

Si ndërmjetës mes kryetarit të Parlamentit të Iranit, Mohammad Bagher Ghalibaf, dhe të dërguarve amerikanë, si dhe Donald Trump, shfaqet të veprojë shefi i ushtrisë së Pakistanit, marshalli Asim Munir, ndërkohë që ministri i Jashtëm i Pakistanit ka zhvilluar mbi 30 bisedime me homologë në Lindjen e Mesme.

Forcat e armatosura të Pakistanit mbajnë një rol kyç në pushtetin e vendit. Edhe në këtë kontekst, Munir ka grumbulluar një pushtet të rrallë që prej marrjes së detyrës si shef i ushtrisë në vitin 2022, falë një ndryshimi kushtetues që e vendosi në një pozicion të unifikuar drejtimi.

Sipas Sky News, Munir ka ndërtuar një marrëdhënie të ngushtë me Trump në lidhje me konfliktin e Pakistanit me India, për të cilin presidenti amerikan ka pretenduar se është mbyllur, madje duke e quajtur atë “marshallin e tij të preferuar”.

Pakistani iu bashkua gjithashtu “Këshillit të Paqes” të Trump menjëherë pas vizitës së Munir në Davos për t’u takuar me presidentin amerikan në janar. Po ashtu, vendi arriti një marrëveshje me një kompani kriptomonedhash të lidhur me familjen Trump për përdorimin e monedhës së qëndrueshme USD1 për pagesa ndërkufitare.

Pakistani mban kontakte të drejtpërdrejta si me Washingtonin ashtu edhe me Tehranin, duke u konsideruar si fqinji më pak armiqësor i Iranit, ndërkohë që gëzon edhe besimin e SHBA-ve, çka e bën një ndërmjetës të besueshëm.

Ambasada e Pakistanit në Washington strehon gjithashtu misionin de facto të Teheranit që prej Revolucionit Islamik. Po ashtu, Pakistani ka popullsinë e dytë më të madhe shiite në botë pas Iranit.

Megjithatë, sipas analizës së Sky News, Pakistani ka edhe motivet e veta për të shtyrë drejt përfundimit të konfliktit: vendi po përballet me ndërprerje në furnizimin me karburant në mes të përplasjes me Afghan Taliban. /Panorama