Kurti kujton zgjedhjet e para demokratike në Kosovë para 28 vjetëve

Gazeta Express

24/05/2020 23:26

Kryeministri në detyrë i Kosovës, Albin Kurti, përmes një shkrimi në llogarinë e tij në Facebook, ka kujtuar zgjedhjet e para demokratike të mbajtura në Kosovë para 28 vjetëve.

Këtë ngjarje Kurti e quajti ngjarje me peshë, kurse pjesëmarrësit e saj, tha se meritojnë respektin dhe vlerësimin tonë.

Tutje, kryeministri në detyrë tha se këto zgjedhje kishin sukses dhe jehona e tyre ishte ndërkombëtare.

Gjithashtu, Kurti kujtoi se në ato zgjedhje lideri i Lidhjes Demokratike të Kosovës, Ibrahim Rugova, u zgjodh president i Kosovës.

Në fund Kurti tha se “24 maji 1992 shënohet si datë kur populli kishte përzgjedhur rezistencën dhe po e konfirmonte pavarësinë. Ai injoronte zgjedhjet e Republikës së Serbisë dhe merrte pjesë masivisht në ato të Republikës së Kosovës, paçka se nën okupim”.

Më poshtë gjeni shrkimin e plotë të Kurtit:

28 vjet nga zgjedhjet e para

Zgjedhjet e 24 majit të vitit 1992 janë një ngjarje me peshë që duhen trajtuar drejt, kurse pjesëmarrësit e saj meritojnë respektin dhe vlerësimin tonë.

Zgjedhjet e para parlamentare, organizuar nga Alternativa e padhunshme demokratike e kohës, ishin një rast i mirë për pasurimin e arsenalit të metodave të organizimit dhe veprimit politik si dhe konsolidimin e pozitës politike së çështjes së Kosovës dhe viseve tjera shqiptare.

Këto zgjedhje po hapnin hullinë e asaj që në teorinë e veprimtarisë së padhunshme quhet strategjia e padhunshme konstruktive – metodat e ndërtimit dhe funksionalizmit institucional edhe në kushte të represionit e okupimit.

Organizmi vetanak i zgjedhjeve në kushte te robërisë dhe të shtypjes kishte pjesëmarrje impresive: 766.068 votues brenda vendit dhe 105.300 në mërgatë. Ato ishin sukses në vete dhe nuk mbetën pa jehonë mbarëkombëtare e ndërkombëtare.

24 maji 1992 është data kur Dr. Ibrahim Rugova u zgjodh President i Kosovës për herë të parë.

Qytetarët treguan guxim dhe vullnet anembanë Kosovës. Për fat të keq, asokohe nuk vazhdoi procesi i kompletimit dhe funksionalizimit të strukturës së pavarur institucionale të Republikës.

Megjithatë, 24 maji 1992 shënohet si datë kur populli kishte përzgjedhur rezistencën dhe po e konfirmonte pavarësinë. Ai injoronte zgjedhjet e Republikës së Serbisë dhe merrte pjesë masivisht në ato të Republikës së Kosovës, paçka se nën okupim.