Kurti ballafaqohet për herë të parë me Vuçiqin, pritet edhe nënshkrimi i një marrëveshjeje - Gazeta Express
string(89) "kurti-ballafaqohet-per-here-te-pare-me-vuciqin-pritet-edhe-nenshkrimi-i-nje-marreveshjeje"

Kurti ballafaqohet për herë të parë me Vuçiqin, pritet edhe nënshkrimi i një marrëveshjeje

Gazeta Express

12/02/2020 11:45

Në Konferencën për Siguri që do të mbahet në Munih të Gjermanisë, prej 14 – 16 shkurt, për herë të parë do të përballen presidenti i Serbisë, Aleksander Vuçiq, dhe kryeministri i Kosovës, Albin Kurti, të cilët do të marrin pjesë në një panel të përbashkët

Këtë gjë e ka konfirmuar vetë presidenti i Serbisë, Aleksander Vuçiq, në një intervistë për “Sputnik”, transmeton Gazeta Express.

Lexo Edhe:

“Albin Kurti do të jetë i pranishëm në panelin e përbashkët në Mynih, ku edhe unë do të jem i pranishëm, kështu do të shohim se si do të jetë atmosfera. Nuk mendoj se do të jetë e hapur për publikun, por më duket se do të jetë një mundësi e mirë për të vlerësuar drejtimin në të cilin mund të fillojnë bisedimet. Kjo është arsyeja pse ky qëndrim në Munih ka një rëndësi të madhe për ne, sepse do të vlerësojmë se cilët janë hapat e mëtejshëm të Qeverisë së Prishtinës, cilët janë hapat e gjermanëve, amerikanëve dhe të gjithë të tjerëve në bashkësinë ndërkombëtare”, ka thënë Vuçiq.

Tutje ai ka thënë se gjatë qëndrimit të tij dyditor në Munih të Gjermanisë në kuadër të Konferencës për Sigurinë, pret të takohet edhe me Përfaqësuesin Special të Trump për dialogun Kosovë-Serbi, Richard Grenell.

Në një intervistë për ‘Sputnik’, Vuçiq ka thënë se në këtë takim me emisarin e Trump do të nënshkruajë edhe marrëveshjen për linjën hekurudhore, që sipas tij, do të lehtësojë shumë jetën e qytetarëve.

“Tani do të udhëtoj për në Konferencën e Munihut për Siguri gjatë të enjtes dhe të premtes, jam duke pritur edhe për takim me Grenellin, për të nënshkruar marrëveshjen për hekurudhat”, ka thënë Aleksander Vuçiq, transmeton Gazeta Express.

Kreu i shtetit serb ka dhënë edhe një trajektore se kah potencialisht mund të shkojë linja hekurudhore, duke përmendur Kurshumlinë-Merdaren dhe pastaj Prishtinën.

Përveç takimit me Grenellin, Vuçiq ka thënë se do të takohet gjatë marsit edhe me kancelaren gjermane, Angela Merkel. Ai ka treguar se e kanë caktuar datën por nuk mund ta thotë për momentin.

“Do të takohem me Merkelin në mars, jemi pajtuar për datën e saktë, por nuk mund t’jua them akoma”, ka thënë presidenti serb. /GazetaExpress/