Kur mbesin pa ide, politikanët pro-serbë në Mal të Zi rikthehen te tërheqja e njohjes së Kosovës

Lajme

Gazeta Express

17/06/2026 8:01

Sa herë që përballen me mungesë idesh për çështjet reale që prekin qytetarët, një pjesë e politikanëve serbë në Mal të Zi rikthehen te tema e Kosovës. Në vend që të ofrojnë zgjidhje për ekonominë, arsimin, shëndetësinë apo zhvillimin e vendit, ata vazhdojnë të përdorin Kosovën si mjet për mobilizimin e elektoratit dhe për fitime politike afatshkurtra.

Në këtë frymë, lideri i Partisë Demokratike Popullore (DNP), Milan Knezheviq, ka njoftuar se do të riaktualizojë iniciativën për tërheqjen e njohjes së Kosovës, këtë herë jo vetëm në komunën e Zetës, por edhe në nivel shtetëror.

Knezheviq deklaroi se ka marrë mbështetjen e kryesisë së partisë së tij për të nisur procedurat që synojnë shfuqizimin e vendimit të Malit të Zi për njohjen e Kosovës. Ai paralajmëroi se këshilltarët e DNP-së në komunat ku partia ushtron pushtet do të dorëzojnë iniciativa të ngjashme, ndërsa deputetët në parlament do të kërkojnë miratimin e një rezolute që do ta obligonte qeverinë të tërhiqte njohjen e Kosovës.

Megjithatë, analistët politikë në Mal të Zi e shohin këtë veprim si një përpjekje për mobilizimin e votuesve para zgjedhjeve të ardhshme parlamentare.

Pedagogia universitare Nikoleta Djukanoviq vlerësoi se iniciativa përfaqëson vazhdimësinë e politikës së DNP-së, por njëkohësisht është edhe përpjekje për të aktivizuar elektoratin në prag të zgjedhjeve. Sipas saj, edhe vetë Knezheviq është i vetëdijshëm se nisma nuk ka gjasa reale të ketë sukses institucional.

“Mal i Zi e ka njohur Kosovën më shumë se një dekadë më parë dhe ky vendim është pjesë e politikës së jashtme dhe obligimeve ndërkombëtare të shtetit, të cilat nuk ndryshohen përmes iniciativave ditore politike”, theksoi ajo.

Edhe drejtoresha e Qendra për Gazetari Hulumtuese e Malit të Zi, Milka Tadiq Mijoviq, ishte kritike ndaj nismës. Ajo deklaroi se Knezheviq po merret me Kosovën sepse nuk ka zgjidhje për problemet reale të qytetarëve.

“Nuk është në gjendje të ofrojë program ekonomik apo reforma që do të përmirësonin arsimin, shëndetësinë apo mbrojtjen e mjedisit. Ai nuk ka asnjë propozim për zgjidhjen e çështjeve të rëndësishme”, tha Tadiq-Mijoviq.

Ekspertët juridikë kanë sqaruar se çdo vendim i komunave për “çnjohjen” e Kosovës do të kishte vetëm karakter deklarativ dhe nuk do të prodhonte asnjë efekt juridik, pasi njohja e Kosovës në vitin 2008 ishte vendim i qeverisë së Malit të Zi dhe jo i pushteteve lokale.

Mal i Zi e njohu zyrtarisht Kosovën më 9 tetor 2008, gjatë qeverisë së udhëhequr nga Milo Djukanoviq. Pavarësisht kundërshtimeve të vazhdueshme nga partitë pro-serbe, ky vendim mbetet pjesë e politikës zyrtare të shtetit malazez dhe e orientimit të tij euroatlantik. /Vijesti.me