Kryeziu: Të gjithë deputetët t’i bojkotojnë seancat që Dehari i hap dhe mbyll sipas tekave të partisë

Lajme

Gazeta Express

12/06/2025 7:58

Nait Hasani nga Partia Demokratike e Kosovës njoftoi se më nuk do të merr pjesë në seanca konstitutive pas 30 dështimesh nga Vetëvendosje e cila as s’i ka votat për Albulena Haxhiun dhe as s’e ndërron kandidaten, ku të votueshëm i ka deri në 40 deputetë të tjerë.

Ismet Kryeziu nga KDI-ja u pajtua me bojkotin e Hasanit, ndërsa shtoi se seancat duhet të bojkotohen nga të gjithë.

Postimi i plotë:

“Sot, vij për herë të fundit në Kuvend” deputeti Nait Hasani

Kur pas mbi 30 tentativash Kuvendi s’po arrin të konstituohet, është e qartë se problemi nuk është më teknik, është politik, është moral.

Deputeti Nait Hasani, përmes këtij veprimi sot tregoi se nuk po ikën nga përgjegjësia. Përkundrazi, po e mbron atë me një akt proteste, bojkotim.

Politika, më shumë se votë e pushtet, është përgjegjësi dhe llogaridhënie – dhe këtë do duhej ta bënin edhe 119 deputetët e tjerë.

Përndryshe, një Kuvend pa diskutim, pa votim, pa përfaqësim, dhe me një udhëheqës që e hap e e mbyll sipas tekeve personale e të partisë që i takon, duhej të bojkotohej nga të gjithë deputetët. Deputetët nuk duhet të heshtin. Nuk duhet të bëhen pjesë e bllokadës që po e vendos shtetin në pauzë dhe po e dëmton demokracinë.