Kryesia s’dakordohet për rendin e ditës për seancën e së premtes, PDK: S’kishte vullnet politik për rezolutën

Lajme

Gazeta Express

08/04/2026 16:27

Kryesia e Kuvendit të Kosovës nuk ka arritur të dakordohet për rendin e ditës për seancën e së premtes, ndërsa Partia Demokratike e Kosovës ka kërkuar që në shqyrtim të futet një rezolutë për mbrojtjen e së kaluarës historike dhe trajtimin e viktimave të luftës.

Nënkryetarja e Kuvendit nga radhët e PDK-së, Vlora Çitaku, tha se kjo çështje nuk duhet të trajtohet si politike dhe bëri thirrje për unitet të deputetëve në miratimin e një teksti të përbashkët.

“Kryesia e Kuvendit nuk ka arritur që të dakordohet për rendin e ditës, të cilin do ta kemi për shqyrtim deputetët e Kuvendit të Republikës së Kosovës në seancën e ditës së premte.

Siç e dini, Partia Demokratike e Kosovës ka proceduar dhe ka protokolluar kërkesën për miratimin e një rezolute të veçantë, e cila për trajtim do të kishte mbrojtjen e të kaluarës sonë historike dhe trajtimin e viktimave të luftës së fundit në Kosovë. Ne, për ne asnjëherë kjo çështje nuk ka qenë politike. Kujtesa nuk është vetëm e kaluara. Kujtesa është identitet. Kujtesa është themeli mbi të cilin ndërtohemi ne si shoqëri, si institucione, si shtet. Ne kemi synuar edhe në seancën e kaluar dhe ne insistojmë edhe sot në kryesinë e Kuvendit, që deputetët e zgjedhur të Kuvendit të Republikës së Kosovës të ulen për miratimin e një teksti të dakorduar mes grupeve parlamentare, dhe përfaqësuesit tanë në Kuvendin e Republikës së Kosovës do të kontaktojnë tashmë grupet parlamentare për të dhënë këtë iniciativë, në mënyrë që në Kuvend të dalim të bashkuar, dhe një rezolutë të tillë ta votojmë me unanimitet, me solemnitet, dhe ta trajtojmë me seriozitet këtë çështje kombëtare”, tha ajo.

Ndërkaq, shefi i Grupit Parlamentar të PDK-së, Arian Tahiri, tha se mungesa e vullnetit politik ka penguar që kjo pikë të përfshihet në rendin e ditës.

“Nuk ka pasë vullnet politik nga përfaqësuesit e Lëvizjes Vetëvendosje dhe si rezultat i kësaj nuk kemi mundë që të vendoset si pikë e parë e rendit të ditës”, tha ai./EO/