Kryeprokurori: Drafti i Kodit të ri Penal thellon shumëfish kaosin

Shqiperi

Gazeta Express

29/07/2025 14:22

Prokurori i Përgjithshëm, Olsian Çela është kundër draftit të Kodit të ri Penal që u prezantua pak ditë më parë. E ndërsa theksoi se institucioni që drejton nuk u pyet për këtë draft, Çela thotë se dokumenti që u paraqit nëse miratohet në këtë version do të rrezikon të minojë funksionimin e drejtësisë, sjell konfuzion dhe paqartësi.

“Përtej sa më sipër, nisur edhe nga çfarë diskutohet këto ditë në media mbi draftin, nuk mendoj se ashpërsimi i dënimeve me burgim është zgjidhja e vetme dhe më e mirë për morinë e problemeve që kalon vendi, në një kohë që kemi një nga kodet me dënime nga më të ashpra në nivel evropian.

Ardhja e draftit në këtë moment mjaft të vështirë për drejtësinë, kur sistemi ende vuan nga mungesat masive në organika dhe mbingarkesa e jashtëzakonshme e dosjeve, nuk do të bënte gjë tjetër veçse do të thellonte shumëfish kaosin në hetim dhe proceset gjyqësore, për shkak të konfuzionit të paevitueshëm që do të sillte zbatimi i normave të reja penale.

Kjo mund të vihet re lehtësisht edhe në mungesën e një kontributi real të magjistratëve në dhënien e opinioneve mbi draftin që nga viti 2023, pikërisht për shkak të ngarkesës së papërballueshme në punë që nuk i lejon të përfshihen cilësisht në një proces kaq delikat dhe të rëndësishëm” tha ai.