Kreu i Pentagonit: Mjaft më me mjekra dhe bullafiqë në ushtrinë amerikane

Gazeta Express

01/10/2025 7:37

Qindra gjeneralë dhe admiralë dëgjuan dje fjalimet e shefit të Pentagonit Pete Hegseth dhe Presidentit Donald Trump në Bazën Ajrore Quantico në Virxhinia. Mbledhja e udhëheqësve ushtarakë amerikanë nga e gjithë bota ishte ideja e Hegseth për të paraqitur vizionin e tij për ringjalljen e asaj që ai e quajti “etos luftëtari”. Trump pranoi se ishte e pazakontë dhe se kishte kosto për t’i sjellë të gjithë në Uashington, tha se ia vlente sepse ishte një ngjarje që i shërbente“shpirtit të trupave”.

I mësuar me turma entuziaste, Trump vuri re menjëherë heshtjen dhe e hapi me një batutë, duke shkaktuar të qeshura: “Nëse doni të duartrokisni, duartrokisni. Nëse nuk ju pëlqen ajo që them, mund të largoheni nga dhoma. Natyrisht, do të humbni gradën dhe të ardhmen tuaj”.Duke u larguar nga Shtëpia e Bardhë pak më parë, Trump u kishte thënë gazetarëve se është gati të shkarkojë menjëherë udhëheqësit ushtarakë që nuk i pëlqejnë. Por në fjalimin e tij, ai vlerësoi të pranishmit: pamjen e tyre, forcën e nëndetëseve, Forcën Hapësinore, aftësitë bërthamore të Amerikës (të cilat ai i quajti “fjala tjetër me N”, fjala tjetër me N që “nuk duhet të përmendet kurrë”).

Presidenti premtoi 1 trilion dollarë për mbrojtjen: “Jam me ju. Ju mbështes 100%”. Ai tha se synonte një ushtri që ishte “më e fortë, më e ashpër, më e shpejtë, më krenare dhe më e fuqishme se kurrë më parë”. Ai foli për luftërat në Lindjen e Mesme dhe Ukrainë. “A do të më japin Çmimin Nobel për Paqen? Absolutisht jo. Do t’ia japin dikujt që nuk ka bërë asgjë, një djali që shkroi një libër për mendjen e Trump” (ai shtoi se mosdhënia e tij do të ishte “një fyerje” për Shtetet e Bashkuara).

Para Trump foli Hegseth që premtoi të përmbysë “dekadat e dekadencës” në ushtri dhe akuzoi “politikanët budallenj” se i japin përparësi “korrektësisë politike” dhe “diversitetit” mbi meritën. “Është krejtësisht e papranueshme të shohësh gjeneralë dhe admiralë të shëndoshë në korridoret e Pentagonit”, deklaroi ish-veterani i Gardës Kombëtare dhe ish-prezantuesi i Fox News. “Epoka e pamjes joprofesionale ka mbaruar. Mjaft me mjekra.” Ai u tha të pranishmëve se nëse fjalët e tij “i dëshpërojnë”, ata duhet të japin dorëheqjen. “Por unë e di që shumica dërrmuese prej jush jeni të inkurajuar.”

Ai mbrojti shkarkimet në ushtri gjatë 8 muajve të fundit (përfshirë Shefin e Shtabit Charles Q. Brown, një afrikano-amerikan, dhe Admiralen Lisa Franchetti, komandanten e parë femër të Marinës).“Për një kohë shumë të gjatë, ne kemi promovuar shumë udhëheqës në uniformë për arsyet e gabuara, bazuar në racë, kuota gjinore, të ashtuquajturat të parat.”

Ai premtoi ndryshime në mënyrën se si trajtohen dhe hetohen ankesat për diskriminim, edhe pse “racizmi dhe ngacmimi seksual” mbeten “të gabuara dhe të paligjshme”. Gjeneralët qëndruan në këmbë në fund për duartrokitje të sjellshme, duke i mbajtur fytyrat pa shprehje siç kishin bërë gjatë gjithë ngjarjes, meqenëse Kushtetuta kërkon që ushtria të jetë apolitike. Pati gjithashtu disa sulme ndaj Bidenit, politikanëve demokratë dhe medias.