Krejt çka ndodhi në seancën gjyqësore ndaj Faton Klinakut për kanosje ndaj Albin Kurtit

Lajme

Gazeta Express

03/09/2025 9:47

Ka përfunduar seanca gjyqësore në Gjykatën Themelore të Prishtinës ndaj Faton Klinakut dhe Nuredin Selmanit, të cilët po akuzohen për kanosje ndaj kryeministrit në detyrë, Albin Kurti. Të akuzuarit u paraqitën në gjykatë dhe u deklaruan të pafajshëm, ndërsa Kurti mori pjesë në cilësinë e të dëmtuarit.

Sipas aktakuzës së Prokurorisë Themelore të Prishtinës, më 30 gusht 2023, Klinaku kishte përsëritur një postim në Facebook me përmbajtje kërcënuese ku shkruante: “Më parë e vras Albin Kurtin sesa t’ia lëshoj rrugën dhe të iki nga Kosova”. Ky postim u vlerësua nga prokuroria si vepër penale e kanosjes.

Në deklarimet e tyre para gjykatës, Klinaku dhe Selmani mohuan akuzat. Klinaku tha se nuk ka kryer asnjë vepër penale dhe nuk bëhet fjalë për kanosje, ndërsa edhe Selmani e mohoi fajësinë me fjalët: “Jo, nuk e pranoj”.

Gjatë seancës, gjykatësi Rrahman Beqiri njoftoi palët se, sipas nenit 240 të Kodit të Procedurës Penale, mbrojtësit e të akuzuarve kanë afat 30-ditor për të paraqitur kundërshtimet ndaj provave.

Albin Kurti, i cili ishte i pranishëm në sallë, deklaroi se nuk do të paraqesë kërkesë pasurore-juridike ndaj të akuzuarve.