KQZ: Votuesit mund të votojnë kryetarin nga një subjekt dhe asamblistin nga një subjekt tjetër

Lajme

Gazeta Express

05/09/2025 10:55

Komisioni Qendror i Zgjedhjeve (KQZ) ka bërë të ditur se në Zgjedhjet Lokale të 12 tetorit 2025, votuesit kanë të drejtë të votojnë në mënyrë të pavarur për dy garat zgjedhore: për Kryetar Komune dhe për Kuvendin Komunal.

Zëdhënësi i KQZ-së, Valmir Elezi, ka sqaruar se është e lejuar që një votues të përzgjedhë një kandidat për Kryetar Komune nga një subjekt politik dhe të votojë për një subjekt tjetër në zgjedhjet për Kuvend Komunal.

“Po, kjo është e lejuar. Votuesi ka të drejtë të votojë në mënyrë të pavarur për secilën garë. Kjo do të thotë që një votues mund të votojë një kandidat për Kryetar Komune nga një subjekt politik dhe një subjekt tjetër politik në zgjedhjet për Kuvend Komunë,” ka deklaruar Elezi.

Ai shtoi se zgjedhjet për Kryetar të Komunës dhe ato për Kuvendet Komunale janë procese të ndara dhe kanë fletëvotime të veçanta, prandaj votuesi nuk është i detyruar të votojë për të njëjtin subjekt politik në të dyja garat.