Kosova synon fitore ndaj Sllovenisë nesër në “Fadil Vokrri”, Foda e Muric optimistë

Futboll

Gazeta Express

09/10/2025 17:55

Kosova do të përballet nesër me Slloveninë në kuadër të kualifikimeve për Kampionatin Botëror, në stadiumin “Fadil Vokrri” në Prishtinë.

Para ndeshjes, në konferencën për media kanë folur përzgjedhësi Franco Foda dhe portieri Aro Muric, të cilët shfaqën besim të madh para sfidës. Portieri Muric u shpreh optimist për rezultat pozitiv, duke theksuar progresin që ka bërë Kosova vitet e fundit.

“Jam shumë i lumtur me performancën time. Pres një fitore nesër. Do të bëjmë gjithçka për të marrë tri pikët. Gjatë këtyre viteve jemi zhvilluar shumë, kemi futbollistë në ligat më të mira dhe nesër kemi rastin ideal ta tregojmë këtë progres”.

Ndërkohë, trajneri Franco Foda qysh në start e konfirmoi se Lumbard Dellova nuk do të jetë i gatshëm për ndeshjen për shkak të një lëndimi.

“Dellova fatkeqësisht është i lënduar dhe nuk do të luajë nesër ndaj Sllovenisë. Atmosfera në ekip është shumë e mirë dhe të gjithë lojtarët e tjerë janë në dispozicion”.

Foda foli edhe për deklaratën e trajnerit të Sllovenisë, Matjaž Kek, i cili kishte thënë se humbja ndaj Kosovës “nuk do të ishte fundi i botës”.

“E kemi një grup mjaft të balancuar dhe një nga më të fortët. Po luajmë në shtëpi dhe skuadra ka vetëbesim pas fitores ndaj Suedisë. Trajneri Kek, bota rrotullohet, jeta vazhdon. Ne do të punojmë dhe do të vazhdojmë. Në ditën e fundit do të dihet kush do ta fitojë grupin e kush do të përfundojë i dyti”.

Kosova synon fitore të madhe në shtëpi për të mbajtur gjallë shpresat për kualifikim historik në Kupën e Botës 2026