Konsensusi, etja për pushtet, ekonomia, ping pongu politik dhe Kosova - Gazeta Express

Shkurt e Shqip

Gazeta Express

04/12/2020 14:37

Konsensusi, etja për pushtet, ekonomia, ping pongu politik dhe Kosova

Shkurt e Shqip

Gazeta Express

04/12/2020 14:37

Është e domosdoshme që ligjvënësit tanë të sigurojnë jo vetëm lehtësimin e menjëhershëm ekonomik, por që ata kërkojnë të riformojnë sistemet dhe politikat tona në mënyrë që të parandalohen krizat në të ardhmen.  Paketat e rimëkëmbjes ekonomike duhet të përbëjnë jo vetëm një stimul, por një rikalibrim të ekonomisë sonë për t’u mbrojtur nga kërcënimet e tjera të së ardhmes.

Shkruan: Taulant Hajrullahu

Rrethanat e reja të cilat i ka vendosur civilizimi janë zhvilluar me një shpejtësi aq të madhe, sa që përparimi i ngadalshëm evolutiv në vendin tonë nuk ka mundur t’i përcjellë. 

Përkundër këtyre kufizimeve shoqërore, epshet rishtazi po e tejkalojnë arsyen e po e dëmtojnë vendin dhe për fat të keq një pjesë e madhe e shoqërisë mendimin e saj e ka të konstruktuar nga lojrat e liderit dhe jo arsyeja ose përceptimi real.

Humbja e arsyes dhe zhdukja e përceptimit real më së shumti erdhi nga politikbërësit, të cilët kanë qenë pengesa e vetme e madhe për mirëqenie dhe përparim në vend, ku duke u mbështetur pas përpjekjeve masive të mashtrimit ata u treguan të suksesshëm në blerjen e kundërshtimeve dhe shitjen e tyre tek militantët.

Jo befasisht, pothuajse të gjithë karakterët e rëndësishëm në vend po e luajnë të njëjtën lojë ku përmes shtrembërimit të së vërtetës po i ikin asaj në mënyrë maestrale.

Shtrembërimi, keqinformimi dhe mospërgjegjësia ndaj vendimeve të rëndësishme të vendit na çon në keqrrugëtim dhe trubullim të së ardhmes.

Shtetet e zhvilluara e ndërtuan të ardhmen e tyre përmes kërkimit të së vërtetës, debatit dhe iniciativës për të ecur përpara përmes konsesusit.

Konsensusi si parim themelor i vendimmarrjes në Kosovë lidhet me teket e liderit dhe jo nevojat e qytetarit. Pasi që këta lider nuk po mund të na krijojnë të ardhmen, ata na krijuan dy lloje të konsesusit: ai ndërkombëtar (kur e kërkojnë ambasadorët ose diplomatët e huaj) dhe konsesusi i zakonshëm (sipas tekeve dhe epsheve të liderit).

Në përgjithësi, kjo nënkupton replikimin dhe kundërshtimin e problemeve aktuale dhe themelimin e skemave të ndërlikuara vetëm për të dalur mirë para elektoratit e për t’u fshehur pas ambicieve së tyre për poste të rëndësishme të vendit.

Replikat dhe kundërshtimet më të freskëta tani mund t’i vëreni se si po e trajtojnë Ligjin për Rimëkëmbje Ekonomike. Asnjëherë nevoja për të ndërtuar një ekonomi më të qëndrueshme dhe gjithëpërfshirëse nuk ka qenë më e qartë ose më urgjente.

Nevojë urgjente për mobilizim masiv për të trajtuar një krizë të përbashkët, për të ndërtuar një të ardhme të drejtë dhe të qëndrueshme.

Është e domosdoshme që ligjvënësit tanë të sigurojnë jo vetëm lehtësimin e menjëhershëm ekonomik, por që ata kërkojnë të riformojnë sistemet dhe politikat tona në mënyrë që të parandalohen krizat në të ardhmen.  

Paketat e rimëkëmbjes ekonomike duhet të përbëjnë jo vetëm një stimul, por një rikalibrim të ekonomisë sonë për t’u mbrojtur nga kërcënimet e tjera të së ardhmes.

Ata gjithashtu duhet të marrin parasysh mbrojtjen e puntorëve, duhet të jenë të vendosur dhe në kohë për të përmbushur nevojat e ngutshme të sotshme, rrjedhimisht edhe të kenë vizionin dhe mençurinë për të planifikuar për nesër.

Prandaj, të gjithë së bashku, është momenti i fundit të veprojnë sepse po sëmuremi ekonomikisht dhe sa më shumë të vonohet procesi, vaksinën për këtë sëmundje të re nuk do të jemi të aftë ta zbulojmë.