Konferenca shkencore “Java e Albanologjisë” fillon edhe pak ditë

Arte

Gazeta Express

19/05/2025 14:41

Fundmaji sjell konferencën shkencore “Java e Albanologjisë”, edicioni i sivjetmë do të fillojë më datën 26 maj nga ora 10:00, dhe do të përfundojë më 30 maj.

Instituti Albanologjik i Prishtinës është duke u përgatitur të mbajë konferencën shkencore “Java e Albanologjisë”. Këtë vit do të organizohet edicioni i gjashtëmbëdhjetë dhe në të do të marrin pjesë studiues të njohur të fushave qenësore të dijeve albanologjike.

Në kuadër të kësaj konference shkencore do të mbahen pesë sesione nga fushat e gjuhësisë, letërsisë, historisë, folklorit dhe etnologjisë, si dhe do të ketë diskutime të ndryshme për çështje të rëndësishme e të veçanta të kërkimeve albanologjike.

Temat bosht të sesioneve që do të mbahen në këtë edicion.

Sesioni i Historisë: “Ndërthurja e identitetit fetar te shqiptarët nga besimet pagane te pluralizmi bashkëkohor”, 26 maj,

Sesioni i Folkloristikës dhe Etnomuzikologjisë: “Kënga si rrëfim, tekst, performancë dhe praktikë social-kulturore”, 27 maj,

Sesioni i Letërsisë: “Kritika letrare shqipe 1945-1990”, 28 maj,

Sesioni i Etnologjisë: “Kultura shqiptare dhe etnologjia urbane”, 29 maj,

Sesioni i Gjuhësisë: “Për një leksikografi bashkëkohore”, 30 maj.