Kollë kronike – efekt i mundshëm i ri i injeksioneve për dobësim

Keshilla Mjekësore

Gazeta Express

12/03/2026 19:39

Injeksionet për humbje peshe të grupit GLP-1 janë konsideruar si një nga trajtimet më efektive të viteve të fundit. Ato kanë ndihmuar miliona njerëz të humbin peshë dhe, sipas studimeve, mund të ulin rrezikun e infarktit dhe goditjes në tru me rreth 20%.

Megjithatë, ndërsa përdorimi i tyre është rritur ndjeshëm, mjekët thonë se po shohin gjithnjë e më shumë pacientë që paraqiten në urgjencë me efekte anësore si të vjella të forta, dehidrim dhe probleme me fshikëzën e tëmthit apo pankreatitin akut.

Tani, një studim i ri sugjeron se personat që përdorin këto injeksione mund të kenë edhe rrezik më të lartë për kollë kronike.

Çfarë është kolla kronike

Kollë kronike konsiderohet ajo që zgjat më shumë se tetë javë. Ajo mund të jetë shumë shqetësuese dhe ndonjëherë shkakton edhe dhimbje të forta në kraharor, për shkak të kontraktimeve të përsëritura të muskujve të kraharorit dhe diafragmës.

Kjo gjendje prek rreth 8–10% të të rriturve dhe zakonisht lidhet me:

astmën

duhanpirjen

disa medikamente.

Çfarë tregoi studimi

Studiuesit nga Keck School of Medicine në Universitetin e Kalifornisë Jugore analizuan të dhënat shëndetësore të më shumë se dy milionë personave me diabet të tipit 2.

Nga këta:

427,555 pacientë përdornin medikamente GLP-1

rreth 1.6 milionë të tjerë përdornin trajtime të tjera për diabetin.

Rezultatet treguan se personat që merrnin medikamente GLP-1 kishin 12–25% më shumë gjasa të diagnostikoheshin me kollë të vazhdueshme krahasuar me pacientët që përdornin terapi të tjera.

Kolla kronike nuk ka qenë më parë e listuar si efekt anësor i zakonshëm i këtyre barnave, por analiza tregoi një rritje të vogël, por të dukshme, të rasteve.

Një lidhje e papritur

Studiuesit fillimisht menduan se lidhja mund të shpjegohej nga refluksi gastroezofageal (GERD), një gjendje kur acidi i stomakut ngjitet drejt ezofagut dhe shpesh shkakton kollë.

Por kur nga analiza u përjashtuan pacientët me këtë diagnozë, lidhja mes medikamenteve GLP-1 dhe kollës kronike jo vetëm që mbeti, por u duk edhe më e fortë.

Pse mund të ndodhë

Shkencëtarët dyshojnë se shkaku mund të jetë një formë tjetër refluksi, e quajtur refluks laringofaringeal (LPR). Në këtë rast, përmbajtja e stomakut ngjitet deri në fyt pa shkaktuar djegien tipike të urthit.

Kjo mund të lidhet me mënyrën se si funksionojnë medikamentet GLP-1: ato ngadalësojnë zbrazjen e stomakut, duke i bërë njerëzit të ndihen të ngopur më gjatë dhe duke ndihmuar në humbjen e peshës. Por kjo ngadalësim mund të lejojë që përmbajtja e stomakut të ngjitet më lart në traktin tretës dhe të irritojë indet e fytit.

Një tjetër mundësi lidhet me nervin vagus, i cili kontrollon refleksin e kollës. Receptorët GLP-1 gjenden edhe në indet e fytit dhe mushkërive, prandaj mund të ndikojnë në rrugët nervore që shkaktojnë kollën.

Çfarë thonë ekspertët

Specialistët theksojnë se studimi nuk provon se këto medikamente shkaktojnë drejtpërdrejt kollë kronike, por vetëm tregon një lidhje të mundshme.

Sizas mjekëve, ky rezultat duhet parë si një sinjal i hershëm, jo si provë përfundimtare. Provat klinike të mëparshme nuk kanë treguar rritje të konsiderueshme të këtij efekti anësor.

Disa pacientë mund të kenë rrezik më të lartë për kollë gjatë përdorimit të këtyre barnave, veçanërisht ata që kanë:

astmë

sëmundje kronike të mushkërive (COPD)

apnea të gjumit

histori të refluksit gastrik.

Çfarë duhet të bëjnë pacientët

Ekspertët këshillojnë që pacientët të mos ndërpresin menjëherë trajtimin nëse shfaqet kollë. Në shumicën e rasteve, situata mund të menaxhohet duke:

kontaktuar mjekun

kontrolluar për shkaqe të tjera të mundshme

rregulluar trajtimin nëse është e nevojshme.

Ndërprerja e trajtimit zakonisht rekomandohet vetëm nëse simptomat janë të vazhdueshme ose të rënda dhe nuk gjendet një shkak tjetër.

Ndërsa përdorimi i medikamenteve GLP-1 vazhdon të rritet, mjekët theksojnë rëndësinë e komunikimit të hapur mes pacientit dhe mjekut për çdo simptomë të re ose të pazakontë gjatë trajtimit. /GazetaExpress/