Një vrasje e katërfishtë ka ndodhur pak pas mesnatës në një plazh të Velipojës. Sipas Policisë së Shqipërisë, ngjarja tragjike ka ndodhur rreth orës 00:30, në Pulaj Plazh, Velipojë, shkruan Gazeta Express.
Për shkak të një konflikti të çastit mes dy pronarëve të dy bizneseve, që lidhej me hapësirën rreth plazhit, rrjedhimisht për çadrat, 4 persona mbetën të vrarë në Velipojë.
Mediat në Shqipëri kanë raportuar se paraprakisht Kujtim Ferracaku, pronar i restorant “Fantazia” është konfliktuar me pronarët e hotel “Gocaj” për shezlonët në plazhin e Velipojës.
Si pasojë ka mbetur i vrarë biznismeni Kujtim Ferracaku (59 vjeçar), dy vëllezërit Xhovani Gocaj (25 vjeçar) dhe Edmond Gocaj, (38 vjeçar), si dhe punonjësi i hotelit, Myzerim Zeneli, (20 vjeçar).
Kurse të plagosur kanë mbetur edhe Hasan Ferracaku dhe Elmilind Dyli.
Detaje të reja nga vrasja e katërfishtë në Velipojë
Policia e Shtetit ka shpallur në kërkim edhe dy shtetas të tjerë si të përfshirë në ngjarjen e rëndë të cilët dyshohen se ishin bashkë me vëllezërit Ferracaku. Ndërkohë janë rreth 20 persona të shoqëruar deri më tani si persona që mund të kenë dijeni të mëtejshme rreth konfliktit që çoi në konfrontimin me armë mes vëllezërve Ferracaku dhe Gocaj. Po ashtu mësohet se në këtë ngjarje mund të jenë përdorur deri në 6 armë.
Sipas të dhënave zyrtare të reja të policisë shqiptare, në këtë konflikt kanë vdekur katër persona teksa janë plagosur edhe katër të tjetër.
Policia ka njoftuar se rasti ka ndodhur mbrëmë në Pulaj Plazh, teksa në mesin e të vrarëve është edhe një 20-vjecar.
Njoftimi i Policisë së Shqipërisë:
Për hetimin dhe zbardhjen e ngjarjes menjëherë është ngritur një grup posaçëm hetimor me specialistë të strukturave hetimore në DVP Shkodër dhe të Drejtorisë për Hetimin e Krimeve ndaj Personit dhe Jetës në Departamentin e Policisë Kriminale në Policinë e Shtetit, nën drejtimin e Prokurorisë së Rrethit Gjyqësor Shkodër.
Në ndihmë të Policisë vendore ka shkuar FNSH Shkodër dhe një grup i Forcave Speciale Renea. Grupi hetimor po punon për zbardhjen e dokumentimin e plotë të rrethanave dhe shkakut të kësaj ngjarjeje.
Çfarë thanë familjarët e viktimave?
Menjëherë pasi kanë mësuar lajmin të parët që kanë shkuar në vendin e ngjarjes në një rrugicë mes dy bizneseve të palëve të përfshira ishin familjarët në britma dhe lot.
“Shezlonget i kam vendosur që në qershor po në sipërfaqen ku i kam pasur vjet. Gjatë qershorit ka filluar ndarja. Unë nuk mund të kundërshtoj asgjë sepse të gjitha janë me dokumente. Ne i kemi vendosur shezlonget përpara se të bëhej ndarja nga shteti dhe ishim në pritje kur të vendosej kjo ndarje për të shikuar se ku i kemi ne dhe ku i kanë ata. Kjo që ka ndodhur mos i ndodhtë më kujt, mua më është fikur dera e shtëpisë”, është shprehur ai.
Ai ka treguar se dy djemtë e tij u vranë para derës së shtëpisë.
“Ata erdhën dhe qëlluan djalin e madh të parin që ishte me dokumente angleze i cili ka ardhur për të investuar dhe punuar. Pastaj qëlluan edhe djalin tjetër. Kur ka ndodhur nuk kam qenë këtu, por nuk kanë ardhur për të folur përderisa kanë ardhur me armë tek dera e shtëpisë. Uroj mos t’i ndodhë kjo më askujt”, ka rrrëfyer ai.
Ndërsa, edhe Myzerim Zeneli vetëm 20-vjeç është njëri prej viktimave në Velipojë.
Gjatë momentit kur dy familjet Ferrcaku dhe Gocaj filluan konfliktin me armë i pranishëm ka qenë dhe 20-vjeçari, i cili ka marrë disa plumba dhe ka humbur jetën./GazetaExpress/
A jeni gati për shpërblimin më të madh në vend nga ETC, Lider i shërbimit dhe tregtimit në vend....