Kina në ankth: Dalai Lama përgatitet për reinkarnimin, planet për pasardhësin në një tubim në Indi

Lajme

Gazeta Express

30/06/2025 10:42

Lideri shpirtëror tibetian, Dalai Lama, në prag të ditëlindjes së tij të 90-të, pritet të zbulojë detaje për planin e tij të pasardhësit gjatë një tubimi të rëndësishëm treditor me figura fetare budiste.

Sipas Reuters, ky hap mund të acarojë më tej marrëdhëniet me Kinën, e cila e konsideron Dalai Lamën si separatist dhe pretendon se do të zgjedhë vetë pasardhësin e tij. Ndërkohë, Dalai Lama, i arratisur nga Tibeti në vitin 1959 pas një kryengritjeje të dështuar kundër sundimit kinez, ka deklaruar se pasardhësi i tij do të lindë jashtë territorit kinez dhe i ka kërkuar ndjekësve të tij të mos pranojnë asnjë person të caktuar nga Pekini.

Sipas besimit të budistëve tibetianë, murgjit e ndritur rishfaqen në jetë për të vazhduar trashëgiminë e tyre shpirtërore. Dalai Lama i 14-të, i cili mbush 90 vjeç të dielën, ka theksuar se do të konsultohet me murgj të lartë dhe figura të tjera për të ndarë të dhëna mbi vendndodhjen e mundshme të rishfaqjes së tij – qoftë djalë apo vajzë – pas vdekjes.

“Do të ketë një lloj kornize përmes së cilës do të flasim për vazhdimësinë e institucionit të Dalai Lamave,” ka thënë ai gjatë një takimi me ndjekësit e tij, pa dhënë detaje. Më herët, ai ka shprehur mundësinë që të rishfaqet në Indi, ku jeton në mërgim pranë qytetit Dharamshala në Himalajet e Veriut. Ai është identifikuar si reinkarnimi i paraardhësit të tij kur ishte vetëm dy vjeç.

Raportohet se konferenca fetare, që mbahet për herë të parë që nga viti 2019, do të mbledhë mbi 100 liderë budistë tibetianë dhe do të përfshijë një deklaratë me video nga vetë Dalai Lama.

Ndërsa, organizatorët kanë njoftuar se ndër pjesëmarrësit do të jetë edhe aktori i njohur i Hollivudit, Richard Gere, ndjekës i devotshëm i budizmit tibetian.