KGJK përzgjedh administratorët në Gjykatën Komerciale dhe tri gjykata themelore, dështon për Supreme dhe Gjilan

Lajme

Gazeta Express

05/09/2025 11:15

Në mbledhjen e 351-të të Këshillit Gjyqësor të Kosovës (KGJK) është miratuar raporti i Komisionit për përzgjedhjen e administratorëve të gjykatave, duke shpallur kandidatët e suksesshëm.

Sipas anëtares së Këshillit, Arjeta Sadiku, për Gjykatën Supreme dhe Gjykatën Themelore në Gjilan duhet të rishpallet konkursi, pasi asnjë nga kandidatët nuk ka marrë pikët e nevojshme për rekomandim për votim në Këshill, raporton Betimi për Drejtësi.

Tutje, Sadiku njoftoi se për Dhomat e Postashme të Gjykatës Supreme ka një ankesë, ndaj nuk mund të vazhdohet me përzgjedhjen e kandidatit të suksesshëm.

Ndërkaq, për Gjykatën Komerciale kandidati i suksesshëm është Kushtrim Gashi, për Gjykatën Themelore në Prizren: Ilir Cakaj, për Pejë: Arben Haskaj dhe Qëndresë Sadrija, dhe për Ferizaj: Vjosa Hasani dhe Kadishe Shabani.

Emrat e kandidatëve u vunë për votim dhe rezultuan:

• Prizren: Ilir Cakaj – 10 vota për
• Pejë: Arben Haskaj – 10 vota për
• Ferizaj: Vjosa Hasani – 7 vota për
• Komerciale: Kushtrim Gashi – 8 vota për, 1 kundër dhe 1 e pavlefshme

Të gjithë kandidatët e përzgjedhur do të kenë mandat 4-vjeçar.