KEDS paralajmëron konferencë më 1 prill për njehsorët elektrikë, thotë se do të japë “sqarimet zyrtare”

Lajme

Gazeta Express

27/03/2026 15:25

KEDS ka paralajmëruar se do të mbajë një konferencë për media lidhur me çështjen e fundit të ngritur në opinion publik, duke iu referuar çështjes që ngriti Lidhja Demokratike e Kosovës për njehsorët elektrikë.

Konferenca do të mbahet të martën, me datë 1 Prill, në ambientet e zyrave kryesore të KEDS-it, duke filluar nga ora 15:00, thuhet në këtë njoftim.

“Ftoheni të merrni pjesë për të përcjellë nga afër qëndrimet dhe sqarimet zyrtare lidhur me këtë çështje. KEDS mbetet e përkushtuar ndaj transparencës, korrektësisë dhe informimit të drejtë ndaj qytetarëve të Kosovës”.

Visar Azemi nga Lidhja Demokratike e Kosovës në disa konferenca për shtyp ka thënë se qytetarët po manipulohen me keqllogaritje të rrymës së shpenzuar në njehsorët elektrikë.

Kryetari i LDK-së, Lumir Abdixhiku, tha se partia e tij kërkon “hetim të menjëhershëm, përgjegjësi institucionale, kompensim për qytetarët dhe ndaljen e çdo rritjeje të tarifave deri në zbardhjen e plotë të gjendjes reale”.