Katër vjet nga vrasja e Qerim Kelmendit, s’dihet kush e vrau – vëllai i tij flet për takimin me prokurorin - Gazeta Express
string(102) "kater-vjet-nga-vrasja-e-qerim-kelmendit-sdihet-kush-e-vrau-vellai-i-tij-flet-per-takimin-me-prokurorin"

Katër vjet nga vrasja e Qerim Kelmendit, s’dihet kush e vrau – vëllai i tij flet për takimin me prokurorin

Lajme

Gazeta Express

28/02/2024 17:11

Dje janë bërë fiks katër vjet nga vrasja e Qerim Kelmendit, ish-pjesëtarit të Ushtrisë Çlirimtare të Kosovës, Qerim Kelmendit. Vrasja e tij ende nuk është zbardhur. Prokurori që e kishte rastin, Haki Gecaj, është pensionuar e tash rasti i ka kaluar prokurorit Shpëtim Peci. As ky e as Prokuroria Speciale s’janë përgjigjur se çka ka ndodhur me hetimet. Për Gazetën Express ka folur një prej vëllezërve të Qerimit, i cili ka treguar bisedën që ka pasur me prokurorin e ri.

Gazeta Express

Lexo Edhe:

Vrasja e ish-pjesëtarit të Ushtrisë Çlirimtare të Kosovës, Qerim Kelmendit, vazhdon të jetë enigmë. Trupi i tij ishte gjetur i djegur brenda një veture në orët e para të mëngjesit të 27 shkurtit 2020, në Zahaq të Pejës.

Prokuroria Speciale nuk është përgjigjur në pyetjet e Gazetës Express lidhur me rrjedhën e hetimeve. Përgjigje s’ka kthyer as prokurori i ri i rastit, Shpëtim Peci, meqë prokurori që e kishte këtë rast, Haki Gecaj, është pensionuar.

Se çfarë ka ndodhur me hetimet nuk janë informuar as familja e Qerimit. Vëllau i tij, Man Kelmendi, i ka thënë Gazetës Express se është takuar për herë të parë me prokurorin e ri të rastit në tetor të vitit të kaluar.

Ai ka ndarë edhe bisedën që ka pasur me të.

”Para 2 muajve, e kam pranuar lëndën e Qërim Kelmendit, nga ish prokurori Haki Geci, i cili ka dalë në pension. Nuk jam i njoftuar me këtë lëndë, por po të premtoj se brenda muajit do t’ju ftoj dhe do t’ju njoftoj në hollësi për rrjedhën e lëndës në këtë fazë të hetimit.”, citon ai t’i ketë thënë prokurori.

Kelmendi thotë se pavarësisht premtimit, prokurori nuk i është lajmëruar më.

“Me keqardhje e them se i njëjti nuk me ka ftuar fare, përkundër premtimit të tij…”, ka thënë ai për Express.

Ai ka sugjeruar që informacionet të kërkohen direkt nga prokurori.

“Për çështje të ndjeshme si rasti i vëllai tonë, Heroit të Kosovës, Qërim Kelmendi, është më mirë të kontaktoni ju me prokurorin  Peci, sepse ai mund t’u jep informacione të sakta dhe më të freskëta (të përditësuara), kur e din se ju jeni gazetare. Ne mendojmë se prokurori i çështjes, z. Shpëtim Peci, është në gjendje të ofroi informacione të sakta dhe relevante për rastin e Heroit tonë. Pra, më se miri do të ishte që pyetjet tuaja t’ia drejtoni prokurorit dhe lirisht t’i thoni se familja e Heroit nuk kishin asnjë informacion nga ju”, ka thënë ai.

Për vrasjen që atëherë kishte tronditur vendin, kishin folur edhe atëherë vëllezërit Kelmendi.

Osman Kelmendi kishte thënë se vëllain ia kishin zënë në pritë.

“Vëllain tim e kanë zënë në pritë mbrëmë. Njëherë e kanë ekzekutuar pastaj e kanë djegë veturën. Ai ka qenë në qytet mbrëmë. Gjithmonë ka dal i lirë për tu shëtitur rrugëve të Kosovës”, kishte thënë Osmani për Express.

Ai kishte hedhur poshtë dyshimet se Qerimi mund të ketë qenë dëshmitar i Gjykatës Speciale.

E për atë se kush mund ta ketë kryer vrasjen, ishte deklaruar vëllai tjetër i Qerimit.

Ish-udhëheqësi i Lëvizjes Popullore të Kosovës, Ibrahim Kelmendi, i kishte thënë Gazetës Express se dyshon që prapa vrasjes së vëllait të tij qëndrojnë vrasës mercenarë, apo profesionistë të BIA-s serbe.

“Dyshoj në vrasës mercenarë apo profesionistë të BIA-s së Serbisë, e cila duhet të ketë shfrytëzua rastin e debatit dhe grindjeve për “vrasjet politike”, për ta ndez edhe më shumë armiqësimin mes “krahëve” të luftës dhe pacifist.

Sa herë që nxiten grindje e debate, BIA shfrytëzon rastin të bëjë vrasje, për ta armiqësuar sa më shumë ambientin mes shqiptarëve”, kishte thënë Kelmendi për Express.