Kater ushqime të përditshme që rrisin sheqerin në gjak po aq sa një dorë me çokollata

Ushqimi/Dieta

Gazeta Express

10/11/2025 21:04

Nuk janë vetëm ëmbëlsirat dhe pijet me gaz që e rrisin nivelin e sheqerit në gjak.

Edhe disa ushqime të zakonshme që konsumojmë çdo ditë – si buka, pasta, patatet apo disa lloje frutash – mund të kenë të njëjtin efekt dhe të shkaktojnë rritje të shpejta të sheqerit, paralajmëron trajneri shëndetësor dhe aktivisti kundër sheqerit, Steve Bennett.

Bennett, autor i librit të sapopublikuar “Sugar Tolerance”, shpjegon se trupi ynë përballon mirë vetëm ngritjet e rralla të sheqerit në gjak. Kur sheqeri rritet, pankreasi prodhon insulinë për ta stabilizuar situatën.

Por problemi lind kur këto ngritje ndodhin shpesh – për shembull, drithëra për mëngjes, bukë në drekë dhe pizza në darkë. Me kalimin e kohës, qelizat bëhen më pak të ndjeshme ndaj insulinës, duke sjellë atë që njihet si rezistencë ndaj insulinës, një ndër shkaqet kryesore të diabetit të tipit 2.

Përveç rrezikut të diabetit, Bennett thekson se rritjet e vazhdueshme të sheqerit nxisin depozitimin e yndyrës, rritjen e peshës, bllokimin e enëve të gjakut dhe madje lidhen me sëmundje të trurit, përfshirë Alzheimerin.

Ai thekson se shumë njerëz gabimisht besojnë se vetëm ushqimet e ëmbla shkaktojnë rritje të sheqerit. Në fakt, karbohidratet, edhe kur nuk janë të ëmbla, shpërbëhen shpejt në sheqer në organizëm. Buka e bardhë, pasta dhe orizi i bardhë përpunohen në sheqer që në gojë, falë enzimës amilazë.

Si ta ulim ndikimin e karbohidrateve?

Bennett rekomandon dy strategji kryesore:

Ulja e karbohidrateve të rafinuara (si buka e bardhë, makaronat, drithërat e përpunuara).

Kombinimi i ushqimeve të pasura me karbohidrate me fibra. Fibra ngadalëson procesin e tretjes dhe parandalon ngritjet e shpejta të glukozës.

Ai sugjeron të fillohet çdo vakt me perime, më pas me proteina dhe yndyra, dhe karbohidratet t’i lini për në fund – një metodë që sipas tij përgjysmon rritjen e sheqerit në gjak.

Cilët janë “fajtorët” kryesorë të përditshëm?

1. Drithërat për mëngjes

Drithërat si “cornflakes” mund të rrisin sheqerin në gjak po aq sa 8 lugë çaji me sheqer.

Zëvendësim i shëndetshëm: kos, vezë, arra, bajame ose perime me proteina.

2. Orizi

Edhe orizi integral, megjithëse më i pasur me fibra se ai i bardhë, prapë është karbohidrat.

Zëvendësime të mira: lulelakra e grirë (si “rizotto”), ose quinoa – e pasur me proteina dhe minerale.

3. Patatet

Patatet, sidomos të nxehta dhe të pjekura, rrisin shpejt sheqerin në gjak.

Alternativë: selinorja (celeriac) – e pasur me fibra, mund të përdoret e zier, e pjekur ose pure, njësoj si patatja.

4. Frutat Tropikale

Mango, ananasi dhe bananet e pjekura rrisin më shumë sheqerin.

Zëvendësim: manaferra, boronica, luleshtrydhe – të cilat ndihmojnë në stabilizimin e sheqerit në gjak.

Jo çdo ushqim i shijshëm dhe “i pafajshëm” është i padëmshëm për shëndetin. Zgjedhjet e vogla të përditshme mund të bëjnë ndryshime të mëdha – sidomos në mënyrën si kombinojmë ushqimet dhe kur i konsumojmë ato. /GazetaExpress/