Kapet në mes të detit kokainë me vlerë 33 milionë dollarë

Lajme

Gazeta Express

22/07/2025 18:13

Autoritetet në El Salvador njoftuan sekuestrimin e 1300 kilogramëve kokainë, me një vlerë prej 33 milionë dollarësh, gjatë një operacioni detar.

Operacioni çoi në kapjen e tre të dyshuarve për trafik droge, të cilët po udhëtonin me një mjet gjysmë nëndetëse, shkruan A2 CNN.

Zyrtarët policor njoftuan për drogën në një konferencë për shtyp në San Salvador.

“Gjatë gjithë administratës së Presidentit Nayib Bukele, janë sekuestruar 69 tonë droga të ndryshme, kryesisht kokainë, të cilat në terma ekonomikë arrijnë në 1619 milionë dollarë”, tha ministri i Mbrojtjes Kombëtare, Rene Francis Merino Monroy.

Trafiku i drogës mbetet një nga sfidat më të mëdha të sigurisë në El Salvador dhe rajonin e Amerikës Qendrore. Shteti ndodhet përgjatë një rruge strategjike që lidh Amerikën Jugore me tregjet e mëdha të konsumit në SHBA. Përpjekjet e qeverisë për të frenuar këtë aktivitet përfshijnë operacione të rregullta detare dhe forca të posaçme kundër narkotikëve. Megjithatë, rrjetet e trafikut janë të sofistikuara dhe përdorin teknologji të avancuar, përfshirë mjete nëndetëse artizanale.