Kapet 42-vjeçari që vodhi 10 mijë euro në një studio ligjore në Tiranë

Shqiperi

Gazeta Express

20/06/2025 12:59

Një 42-vjeçar është arrestuar nga policia e Tiranës, si i dyshuar për një grabitje të ndodhur në vitin 2023 në një studio ligjore në bulevardin “Gjergj Fishta”. Ai akuzohet se ka bashkëpunuar me një çift bashkëshortësh për të marrë një shumë prej 10 mijë eurosh.

Operacioni për kapjen e tij, i koduar “Kodi”, u organizua nga strukturat për hetimin e krimeve të rënda në bashkëpunim me Komisariatin Nr. 2. Pas disa hetimeve dhe informacioneve operative, policia arriti ta lokalizojë dhe ta ndalojë.

42-vjeçari, me inicialet E.(F.) L., ndodhet tashmë në paraburgim, ndërsa Gjykata e Tiranës ka caktuar ndaj tij masën e sigurisë “arrest në burg”. Ai do të përballet me akuzën për “Vjedhje me pasoja të rënda, kryer në bashkëpunim”.