Kaos në aeroportet evropiane, gjysma e fluturimeve anulohen

Lajme

Gazeta Express

21/09/2025 10:08

Pasagjerët në disa nga aeroportet kryesore të Europës janë përballur edhe këtë të diel me vështirësi serioze, si pasojë e një sulmi kibernetik që goditi të shtunën sistemin e regjistrimit të fluturimeve. Ndërprerja ka shkaktuar anulime masive dhe radhë të gjata në terminale.

Aeroporti i Brukselit konfirmoi se 50% e fluturimeve të së dielës, 21 shtator, do të anulohen për shkak të problemeve të vazhdueshme në sistemin elektronik të check-in-it.

“U kemi kërkuar linjave ajrore të anulojnë gjysmën e fluturimeve për të shmangur kaosin dhe anulimet në moment të fundit,” deklaroi një zëdhënës i aeroportit.

Eurocontrol, agjencia evropiane e menaxhimit të trafikut ajror, u kërkoi kompanive ajrore të reduktojnë oraret drejt dhe nga Brukseli deri të hënën.

Aeroporti Heathrow në Londër raportoi vonesa për disa linja ajrore, për shkak të një “problemi teknik” në sistemin e regjistrimit. British Airways ka kaluar në një sistem rezervë dhe po operon normalisht, por shumë kompani të tjera vazhdojnë të përballen me pengesa.
Në Berlin, Aeroporti Brandenburg regjistroi pritje të gjata dhe vonesa të konsiderueshme.

Kompania amerikane RTX, pronare e Collins Aerospace, konfirmoi se sistemi Muse – softuer i përbashkët për regjistrimin e pasagjerëve dhe dorëzimin e bagazheve – ishte objektivi i sulmit kibernetik. Muse përdoret nga një numër i madh linjash ajrore në terminale të përbashkëta. Hetimet për origjinën e sulmit vijojnë, ndërsa Collins Aerospace nuk ka dhënë ende shpjegime publike mbi natyrën e tij.

Komisioni Evropian deklaroi se po “monitoron nga afër” situatën, duke sqaruar se deri tani nuk ka prova për një kërcënim më të gjerë. Sipas platformës FlightAware, qindra fluturime u vonuan në të gjithë Europën që prej së shtunës. Në Irlandë, aeroportet e Dublinit dhe Korkut raportuan vetëm “ndikim të vogël”, pasi disa linja ajrore kaluan në regjistrim manual. EasyJet dhe Ryanair, që nuk përdorin sistemin Muse, thanë se operojnë normalisht.

Ndërkohë, në Dublin një incident i veçantë shkaktoi evakuimin e përkohshëm të Terminalit 2, pas një alarmi për bagazhe të dyshimta që rezultuan të padëmshme.

Ekspertët e sigurisë kibernetike theksojnë se sulmi nxjerr në pah sërish dobësinë e industrisë së aviacionit ndaj goditjeve në infrastrukturën dixhitale. Ka dyshime të pakonfirmuara se hakerë të lidhur me Moskën mund të jenë të përfshirë, por analistët kujtojnë se shumica e sulmeve të mëdha vitet e fundit kanë qenë vepër e grupeve kriminale që synojnë përfitime financiare përmes zhvatjes.

Në korrik, një defekt global i shkaktuar nga një përditësim i gabuar i CrowdStrike paralizoi përkohësisht transportin ajror në SHBA – duke treguar edhe një herë varësinë kritike të aviacionit nga sistemet dixhitale.