Kacey Musgraves: “Pashë UFO që dukej sikur shoqëronte avionin tim”

Mistere

Gazeta Express

10/04/2026 23:50

Këngëtarja e njohur amerikane e country-t, Kacey Musgraves, ka shkaktuar reagime të shumta në rrjete sociale pasi ka treguar një përvojë të pazakontë gjatë një fluturimi, të cilën e ka përshkruar si “takimi më i çuditshëm me UFO ndonjëherë”.

37-vjeçarja, fituese e disa çmimeve “Grammy”, tha në një “Instagram Story” se gjatë udhëtimit nga Fort Worth (Teksas) drejt Nashville (Tennessee), ajo dhe menaxheri i saj vunë re drita të pazakonta në qiell.

Sipas saj, objektet ndriçuese u shfaqën për rreth 45 minuta dhe dukeshin sikur po e ndiqnin avionin nga zona e Little Rock, Arkansas, deri në destinacion.

“Këto drita nuk lëviznin si asnjë mjet që mund të kontrollohet nga njeriu. Shfaqeshin dhe zhdukeshin herë pas here, duke formuar modele trekëndore,” ka treguar ajo. “Ndonjëherë ndriçonin shumë fort dhe ndryshonin ngjyrë e madhësi.”

Pas uljes së avionit, Musgraves tha se kishte folur me pilotët, të cilët sipas saj i kishin thënë se fenomene të tilla i shihnin “çdo natë” dhe se edhe pilotë të tjerë kishin raportuar të njëjtat drita, pa e ditur çfarë ishin.

Ajo ndau edhe një video ku duken drita të largëta në qiellin e natës, të cilat lëvizin në mënyrë të pazakontë në distancë. Vetë këngëtarja pranoi se cilësia e pamjes ishte e dobët, duke e përshkruar me humor si “e filmuar me një pajisje shumë të dobët”, për shkak të distancës dhe errësirës.

Musgraves tha gjithashtu se ka përjetuar edhe më parë fenomene të pashpjegueshme, nga “drita që digjen në qiell” deri te objekte që nuk mund t’i identifikojë.

Këngëtarja është vetëm një nga personazhet e njohur që kanë folur publikisht për përvoja të ngjashme. Më herët, Miley Cyrus ka deklaruar se është ndjekur nga një objekt i paidentifikuar në Kaliforni, ndërsa Demi Lovato ka shprehur bindjen se kontaktet me forma jashtëtokësore janë reale dhe ka folur për eksperienca meditative që, sipas saj, lidhen me fenomene të tilla.

Pavarësisht deklaratave, asnjë nga këto raste nuk është konfirmuar shkencërisht dhe mbeten dëshmi personale të pa verifikuara. /GazetaExpress/